1617/2024-2025

Aizawl the 16th August, 2024: India thla lem Chandrayaan-3 hlawhtlinna denchhenin thla leilung a rah ni 23, August chu Prime Minister Narendra Modi chuan National Space Day ah a puang a. Hemi lawmna chi khat atan hian, Vawiin chawhma dar 10:00 khan 'Workshop on Emerging Space technology, appplication in water resource management' chu Irrigation and Water Resources Dept Auditorium, . MINECo, Khatla, Aizawlah neih a ni a. Pu PC Vanlalruata, Minister, IWRD chuan khuallian niin a hmanpui a. Pu V. Lalengmawia Addl. Secretary, (IWRD)-in inlawmna thu leh Workshop kaldan tur sawiin; Er. Lalrotluanga, chief engeneer, IWRD-chuan Workshop-in a   tum tlangpuite a tar lang bawk a ni.

Khuallian chuan kal khawmte hmaah thu sawiin, ram puma National Space Day puala hetiang workshop buatsaihna tur state 11 zinga Mizoram thlan a ni chu ropui a tih thu a sawi a. Workshop-in a tum ang tak a Space lama thiamna chu tangkai tak a hman zel theih a nih ngei a besei thu a sawi. Space lama thiamnain kan ram leilung a tui awmte hman tangkai kawnga min puih dan tur te a tar lan bakah; heeti lama Dept. (IWRD) hmalakna kal mek thenkhat: Real TIme Data Acquisition System (RTDAS) chungchang te, State Water Informatics Centre din tura theihtawp an chhuah mek thute a tar lang nghal bawk a ni.

Ministry of Jal Shakti chuan Mizoram telin, State thlan bik 11 ah National Space Day hmang tur hian ruahmanna a siam a, a lawmna pui ber erawh August 23, 2024-ah New Delhi-a hman tur a ni. Ministry  lam hian National Space Day lawm nan Water Resources lama Space Technology kan hman tangkai dan Workshop buatsaih tura a tih angin, Mizoramah chuan “Emerging Space Technology Application in Water Resources Management” tih thupui hmangin Irrigation & Water Resources Dept., Pachhunga University College leh Indian Institute of Technology Roorkee te nena tangkawpin workshop buatsaih a ni.

He workshop ah hian IIT Roorkee, National Institute of Hydrology, North Eastern Regional Institute of Science and Technology (NERIST), North Eastern Space Application Centre, Survey of India, Central Water Commission, Central Ground Water Board, Pachhunga University College leh Irrigation & Water Resources Department atangin mithiam tak tak ten hun an hmang a; Department hrang hrang atanga rawn kal te bakah zirlai 100 chuang kalkhawmte nen sawi hona hlawkthlak tak neiin hun tha tak hman ho a ni.