984/205-2026

Aizawl| Ni 27, Nikir thla, 2025: Vawiin khan National Statistics Day vawi 19-na chu Directorate of Economics & Statistics buatsaihin, Economics & Statistics Conference Hall, MINECO-ah hman a ni a, Pu TBC Lalvenchhunga, Adviser to Chief Minister (Planning & Finance) chu Khuallian niin Pu Lalmalsawma Pachuau, Secretary, Planning & Programme Implementation Department chuan he ni puala hun hman hi a kaihruai a ni. National Statistics Day hi Indian Scientist leh Statistician ropui, Professor Prasanta Chandra Mahalanobis (1893-1972) pian cham’ hriat reng nan kum tin hman thin a ni a, kumina Statistics Day Thupui hi ‘75 Years of National Sample Survey’ tih a ni. 

Khuallian Pu TBC Lalvenchhunga chuan, Sorkar-in Planning a ngaih pawimawh thu leh Economics & Statistics-te hnathawh pawimawhzia a sawi a. Data dik leh rintlak neih a pawimawhzia te, a bik takin Market intelligent hnuaia Department hrang hrang Data inang khat neih a tul thu te, Multi Dimension Poverty Index Survey neih a tul thu te, GSDP Calculation Method fimkhur taka kalpui a pawimawh thu te, thawktute training neih tam a pawimawh thute sawiin rah tha nei tura hna thawh a pawimawh thu a sawi a, Department hrang hrangte hlutna pawh an tam leh tlemah te ni lovin ram tana an an thawh hlawk leh hlawk loh dan (output) atangtea teh thin tur a nih thute a sawi bawk a ni.

Pu Lalmalsawma, Secretary, P&PID chuan, tunah hian NSS survey 80th round neih mek a nih thu sawiin, survey hian Social Consumption; Health, Comprehensive Modular Survey on Telecom and Education; Domestics Tourism Expenditure Survey leh National Household Travel Expenditure te a huam dawn thu a sawi bawk.

National Statistics Day hmannaah hian Pu Lalrinkhuma Sailo, Principal Adviser lo ni tawh thin te, Pu K.Lalrammuana, Principal Scientific Officer leh Pu Lalrinchhana, Principal Adviser ten thu an sawi bawk a. Principal Adviser Pu Lalrinchhana hian District Domestic Product-te pawh neih tum chhoh nise a duh thu a sawi a ni.

Pu B. Lalrinhlua, Director, Economics & Statistics hnen atangin Department hmalakna hrang hrang report ngaihthlak a nih hnuin chawhma hun tih tawp a ni a. Chawhnu lamah Pi Mary Lalrinchhungi, Joint Director kaihhruaiin, University leh College thlan bik heng - MZU, ICFAI, PUC, GAC leh HBC-a zirtirtute leh zirlaite nen Technical Session hun hman ho leh a ni a. Pu C.Vanlalvena, Assistant Director chuan ‘75 years of National Sample Survey’ tih thupui hmangin presentation a pe a, sawi hona hun hlawkthlak tak hmanzui a nih hnuin National Statistics Day puala hun hman chu khar a ni ta a ni.

National Statistics Day atana puan, Professor Prasanta Chandra Mahalanobis (1893-1972) pian ni hi June ni 29-a ni a; mahse kumin 2025 hian Pathianni nen a innan a vangin June ni 27-ah hman a ni.