National Switch Day chu vawiin khan I&PR Conference Hall, Mamit-ah hman a ni a, Addl. DC Pu H.Lianzela'n a hmanpui.

Pu H.Lianzela chuan hriselna lama hnathawk te inpekna leh hmalakna avanga Mamit District mipui te hriselna a tha chho zel chu lawmawm a tih thu sawiin, tan la sauh sauh turin a chah a. Switch programme pawh hlawhtling taka hman anih theih nan thawktu te'n mahni tih tur theuh tha taka tih a ngai a ni tiin, thahnemngai taka kalpui leh turin a fuih bawk.

India ram chu zenghri awm lohna ah World Health Organisation kum 2014 khan a puan tak avangin, Trivalent Oral Polio Vaccine (tOPV) routine immunization leh zenghri umbo beihpui thlak nana hman thin leh hman mek chu hman angaih tawh loh avangin Bivalent oral polio vaccine (boPV) ah thlak a ni dawn ta a ni. tOPV ah hian zenghri chi thum type 1, 2 leh 3 a awm a, type 2 hi khawvel atanga bo tawh a dah anih avangin type 1 leh 3 chauh awmna bOPV ah thlak ani ta a ni.Vawiin National Switch Day hian bOPV chu zenghri laka inven nan hman tan a ni tawh ang.

Hetia damdawi thlakthleng anih dawn tak avang hian Mamit district chhunga ASHA,cold chain enkawltute leh health worker te training pek nghal an ni a. tOPV hman bang la awm zawng te laklet hna kaihhruaina mumal tak hnuaiah neih a ni ang.