No.994/2020-2020

Vawiin khan Directorate of Science & Technology chuan an Conference Hall-ah Dr. C. Vanlalramsanga, Secretary, Planning & Programme Implementation Department hovin National Technology Day 2020 an hmang.

Dr. C. Vanlalramsanga, Secretary chuan Science & Technology pawimawhzia leh he lama hma kan sawn zel a tulzia sawiin Mizorama Science & Technology-a thawktute thahnemngaihna leh taimakna avanga lawmthu sawiin kal khawmte a fuih a, COVID-19 vanga buaina kan tawh mekah hian nasa zawka research beih a, Mizoram chhung bika kan buai theihna te Science and Technology hmanga sut kian a nih theih nan theihtawp chhuah zel turin kal khawmte a fuih bawk. Secretary hian MISTIC Scientist-te buatsaih lehkhabu pathum (Intellectual Property Rights, Climate Change Thlirzauna: Khawvel leh Mizoramah leh Covid-19 Chungchanga Zawhna leh Chhanna Thenkhat), Mizo tawnga ziak chu a tlangzarh bawk.

National Technology Day hmanna hun hi Dr. R. K. Lallianthanga, Chief Scientific Officer-in a kaihruai a, tunhnaia Science & Technology lama hma kan sawnna hrang hrang te sawiin State dang ngaihtuaha hmalakna tur kan la ngahzia a sawi a. Covid-19 chungchang sawiin Mizoram Science Centre-a Innovation Hub-in Protective Visor tha tak an siamchhuah thu leh chungte chu Health Minister leh Home Minister-te 12 ve ve hlan a nih thu a sawi lang bawk.

Pu H. Lalsawmliana, Principal Scientific Officer-in National Technology Day kan lo hman tawh thin dan report tlangpui a pe a. Pu Samuel Lalmalsawma, Senior Scientific Officer chuan lehkhabu pathum tlangzarhte chungchang sawifiahna hun a hmang bawk.

He mi zawh hian MISTIC Scientist ten hand sanitizer siamna laboratory an buatsaih chu en ho a ni a, hand sanitizer siam dan awlsam te a in kawhhmuhna Mobile Apps entir niin, kut hmang lo a ke a control theih tui herh hawna an siamchhuah pawh entir a ni bawk.

National Technology Day hi May ni 11, 1998-a Rajasthan-a Pokhran thlalera India in Nuclear enchhinna hlawhtling taka a neih hriatrengna leh Science leh Technology lam mite infuihtharna ni atan India ram pumpuiah hman thin a nih angin kuminah hian a huhova mi tamtak punkhawm theih loh ni mah se, Science & Technology leh a hnuai peng hrang hrang Mizoram Science, Technology & Innovation Council (MISTIC), Mizoram Remote Sensing Application Centre (MIRSAC) leh Mizoram Science Centre (MSC) a officer-te kal khawmin hman a ni.