152/2024-2025

Aizawl, the 11th April, 2025: Naupangte pual atana buatsaiḥ Nuapang Pual Kut 'National Tribal Youth Festival' ni lina leh a tawp ber chu vawiin khan State Tribal Resource & Training Center, Kelsih ah neih a ni a. He hun hi Pi Lalzarmawii, Commissioner & Secretary, SW&WCD Department chuan khuallian niin a hmanpui a ni.

Khuallian Pi Lalzarmawii, Commissioner & Secretary, SW&WCD Department chuan naupangte kaihhruaina kawngah leh humhimna kawngah mitinin hma thar kan lak a tul zia sawiin, he hun hlu tak buatsaih thei tura Directorate of Social Welfare hmalakna fakawm a tih thu a sawi bawk.

Pu Jimmy Laltlanmawia, Chairperson, Mizoram State Commision for Protection of Child Rights in naupangte chanvo leh dan in naupangte a humhalh dante sawifiahin, naupangte chu ruihhlo leh a kaihhnawih nunna titawi thei laka fihlim turin a fuih bawk.

Naupangte tana ni bik a nih angin Department leh Tristan Entertainment-te ruahmannain Mizo thawnthu leh nunphung behchhanin 'Zo Kawsplei' inelna neih a ni a, Primary, Middle leh open category-ahte inelna neih a ni a, Aizawl khawpui chhung leh pawn atangin sikul leh college hrang hrangte inelin, he inelna-ah hian sikul 30 an tel thei a ni. Aizawl khawchhunga Child Care Institutions 15 lai he programme chhim turin an tel bawk.

Hemi bakah hian Department leh Mizo Indigenous Games Associations (MIGA) tangkawp buatsaihin pi leh pute hun lai atanga Mizo naupangte infiamna chi hrang hrang ataka entir a nih bakah, school naupangte tan intihsiakna buatsaih a ni a, thlirtu mipuite'n an hlut hle a ni. Department leh MCO te buatsaihin school naupangte tan hnam lam intihsiakna neih a ni bawk.

National Tribal Youth Festival tawpna ber hun hman hi Dr. Lalhriatzuali Ralte, Director, Department of Social Welfare chuan kaihruaiin inlawmna thu a sawi a. Naupangte chu Pathian tihna leh thuawihna nun nei turin a fuih a. Pi Zonunthari, Joint Secretary, Social Welfare and Women & Child Development chuan lawmthu sawiin hun hman a khar a ni.