Vawiin khan rampum rualin Lunglei -ah pawh ‘National Voluntary Blood Donation Day’ hman a ni a. Blood Bank, Civil Hospital, Lunglei-ah he Ni pualin mi 117 (mipa 68 leh hmeichhia 49) in a mamawhte hman turin thisen an pe a, heng zinga a zatve chu Govt. HSS Lunglei zirlai te an ni.  

Hawnna inkhawm hi Dr.Zolianthanga Jongte, Blood Bank Officer, Lunglei-in kaihruaiin kum tin Lunglei Civil Hospital-ah he Ni pualin thisen pekna runpui hman thin a nih thu a sawi a. Report-a tarlan danin kum 2010-11 chhung khan thisen 1407 Unit (56.87%) donate a ni a, kum 2011-12 chhungin 2288 Unit (93%) donate a ni bawk a; kum 2012-13 chhungin 2244 Unit (88.96%) donate niin kum 2013-14 chhungin 2313 Unit (87.05%) donate a ni thung. Kumin January atanga September thlengin 1500 Unit donate niin chung atang chuan 50 Unit chu hman tlak loh a nih thu a sawi a, thisen pek dawna thisen test-na result hi donor ten an ngai pawimawh ngei ngei tur a ni, a ti bawk.

Dr.K.Lalsanga, Superintendent, Civil Hospital, Lunglei pawhin thusawiin mihring thisen hi khawvel thiamna pawhina a siam chhuah thiam loh, thil hlu tak a ni; thisen pek hi midangte tana malsawmna leh a mamawhtute tan damna a ni a, chuvangin kan thisen hlu tak hi midangte tan i hlan zel ang u, a ti.