Rampum huapa January ni 25, 2013 (Zirtawpni)-a National Voters’ Day hman tur chu Aizawl-ah pawh hman a ni dawn a. National Voters’ Day puala inkhawm Vanapa Hall, Aizawl-a neih turah Mizoram Larsap Pu Vakkom Purushothaman chu Khuallian a ni ang a, Chief Electoral Officer Pu K.Riachho, IAS-in inkhawm a kaihruai dawn a ni. He inkhawmah hian sorkar official Under Secretary chin chunglamte chu kim taka kal tura beisei an ni.

Chief Election Commission duhdan angin naktuk January ni 24 (Nilai Thawhtanni) khian sorkar office leh zirna in zawng zawngah ‘National Pledge’ chham tur a ni a, Mizoramah pawh sorkar hnathawk zawng zawngte leh zirlai ten he Pledge hi an chham dawn a ni.

National Voters’ Day pual hian Election Department-in National Voters’ Day puala hla (Mizo tawngin) leh Essay inziahsiak a huaihawt a; hla phuah 52 leh Essay 200 chuang thehluh a ni tawh a ni. Heng lawmman te hi National Voters’ Day lawmna inkhawm-ah Larsap-in a hlan nghe nghe dawn a ni. Election Department chuan National Voters’ Day lawmna inkhawm, January ni 25 (Zirtawpni) chawhma dar 11:00-a neih turah mi zawng zawng tel turin a sawm a ni.