Rampum rualin vawiin khan National Voters’ Day vawi 8-na chu Mizoramah hman a ni a. Aizawlah a lawmna inkhawm hi Synod Conference Centre-ah neih niin, Mizoram Governor Lt. Gen. Nirbhay Sharma PVSM, UYSM, AVSM, VSM (Retd) chu Khuallian a ni.

Mizoram Governor chuan kohhran leh tlawmngaipawl te thawhhona avanga Mizorama inthlan dik leh fel fai awm thin chu hmun danga awm ve zen zen lo a ni tiin, India ramchhung mai nilo khawvel ramdangte pawhin hria se a tih thu a sawi a. Tunhnaia Special Summary Revision phochhuahah mipa aiin hmeichhe voter tam zawk mahse inthlanah hmeichhe candidate an la tlem chu pawi a tih thu a sawi a. Hmeichhiate dinhmun chawikan a nih theih nan inthlanah emaw sawrkar inrelbawlnaah dinhmun sang zawka kan dah a ngai a ni, a ti. Pianphunga rualbanloten mipui rorelnaa an chanvo dik tak an hmuh theih nan, an tana thawk zel turin kalkhawm te a sawm nghal a ni.

Persons with Disabilities Commissioner Dr. Lalnunthara chuan kumin National Voters’ Day thupui ‘Accessible Elections’ chungchangah thu sawiin, pianphunga rualbanlote tana harsatna awm lova vote thlak chu an chanvo a nih thu a sawi a. Chief Electoral Officer chu Supreme Court-in thupek anga polling station tina insak hmang tidanglam tura accessibility plan ruahman turin a ngen a. Tlawmngaipawl leh zirlai naupang te chu pianphunga rualbanloten vote an thlak dun nan an theih anga fuih turin a chah a ni.

Chief Electoral Officer Pu S.B. Shashank, IAS chuan inlawmna thu sawiin, kumin inthlana Voter Verified Paper Audit Trail (VVPAT) hman tum a nih thu a sawi a. National Voters’ Day lawmna puala inelna hrang hrang an buatsaih te a tarlang a ni. Pu Malsawmzuala, Asst. CEO chuan lawmthu sawiin hun a khar a ni.

He programme-ah hian Chief Election Commissioner Om Prakash Rawat-a thuchah leh VVPAT chungchang thlirho a ni a. Governor chuan voter tharte hnenah EPIC Card semin, quiz leh drawing competition-a titha te hnenah lawmman a sem a. Booth Level Officer (BLO) leh Assistant Electoral Registration Officer (AERO) hna thawk thate hnenah lawmman a hlan bawk a ni.