2200/2022-2023
Champhai, the 6th October, 2022: Nungcha humhalhna hapta, '68th National Wildlife Week- 2022', October ni 2 atanga ni 8, 2022 chhung awh tur hmanna kalzelah vawiin chawhnu dar 1 khan Environment, Forest & Climate Change Department, Champhai Forest Division bultumin Hnahlan Community Hall-ah nungchate humhalh a pawimawh zia inzirtirna hun hlawhtling tak buatsaih a ni.

Pu Lalduhthlana, DFO Champhai Forest Division chuan thu sawiin nungcha humhalh pawimawh zia te, nungchate tihlumtu leh tiduhdantute hrem an nih dan te, nungcha humhalhna dan chi hrang hrang leh kaihhnawihte power presentation hmangin a sawi fiah a.Mipui kalkhawmte chu Pathianin duh taka a siam nungchate leh an chenna ramngaw tichereutu ni lova venghimtu ni theuh turin a sawm a ni.

He hunah hian Champhai District Honorary Wildlife Warden Pu Lalhlupuia chuan Sik leh sa inthlak danglamin nungchate a nghawng buai dan sawiin khawvela kan chenpui, kan tana ṭangkai em em nungchate leh an chenna ramngawte venghima humhalhtu ni ṭheuh turin kalkhawmte a sawm a. Khawvelah hian thing leh mau, nungchate hi awm lo ta se, keini mihringte tan damkhawchhuahna tur a awm bik lo a ni a ti.

He hunah hian District Level Narco Coordination Centre (NCORD) ruahmanna angin Pu C.Hmingthantluanga, ASI, Champhai Police Station chuan ruihhlo hman sual pawi zia leh a ṭhat loh ziate sawiin, Zirlaite chu kan hnam hmelma, nun titawia, piansualna thlentu ruihhlo laka inthiarfihlim turin a sawm a. Kalkhawmte chu ruihhlo thalo tawlhtute zeppuitu ni lo tur te, a hlauhawm zia hriaa ti chhintu ni lo tur leh ruihhlo chu ti ve chhin lo hrim hrim turin a sawm a ni.

Pu Phairothianga, Hnahlan Joint YMA President pawhin he hunah hian thu sawiin, EE&CC Department-in an khuaa nungcha humhalhna kawnga inzirtirna an buatsaih avangin lawmthu a sawi a. Zirlaite chu YMA in hma a lak mek, ruihhlo do leh nungcha humhalh tipuitlingtu ni turin a sawm a ni.

He hun hi Pu Lalremruata Cherput, VCP Hnahlan chuan a kaihruai a. Hnahlan Forest Range Officer, Pu Lallianvunga'n lawmthu sawiin he hun hman hi a khar a ni.

He hunah hian Hnahlan khuaa Middle School chin chunglam, High School leh Higher Secondary sikul zirlaite bakah VC, YMA, MHIP leh MUP hruaitute an tel thei a ni.