Nihnih awh tur World Trade Organisation leh Regional Trading Arrangements chungchang zirhona National Seminar chu vawiin khan I & PR Conference Hall-ah Indian Institute of Foreign Trade leh Mizoram University-a Economics Department bultumin tan a ni a. Parliamentary Secretary Pu Lalrinmawia Ralte chuan chuan the National Seminar hi a hawng a ni.

Seminar Hawnna thuchah sawiin Pu Lalrinmawia Ralte chuan tunlai khawvelah hian hriattur hriat hi thil pawimawh ber pakhat a ni tawh a. Khawvel pum huapa insumdawn tawnna chungchangah te ram leh ram, khawbil leh khawbil sumdawn kawnga inlaichinnaah te hian hriattur leh zir thar tur pung ve zel hi a mawhphurtuten an zirchiana mipui nawlpui hriata tarlan chu thil tul ber a ni tawh a ti. Hetiang zirhona changkang tak IIFT leh Mizoram University in an buatsaih chuan rah tha a chhuah ngei a beisei thu tarlangin an zirchhuahte chu mipui nawlpuiah hrilhhriat nise Mizoram ang hmun kilkhawr tak a chengte tan thil tangkai tak a ni ang a ti a. Asia ram dangte nena insumdawn tawnna zau zawk Look East Policy chu India sorkar-in bul a tan tawh dante tarlangin hemi hnuaiah hian hmarchhak state te chuan remchanna thui tak an nei thei ang a ti a. India hmarchhak bial chu sumdawnna chhuah ka a nih theih dawn avangin he seminar pawh hian rah duhawm tak a thlen ngei a rinawm a ni a ti.

Seminar hawnna hi Prof. Lianzela, MZU in kaihruaiin Centre for WTO atanga lo kal Prof. Madhukar Sinha chuan thuhma a sawi a lawmthu sawina hun Prof. Thangchungnunga, Head of Department, Economics, MZU in a chang. Seminar chhung hian  khawvel pum leh ram bial hrang sumdawn chungchang thu pawimawh then hrang hrang tarlana sawihona hun hman a ni ang.