4766/2024-2025

Champhai, 24th March, 2025: Vawiin zing dar 6:30 khan Nature Learning Centre(NLC)-Mizoram hnuaiah Higher Secondary School zirlai thlan bikte chu Dampa Tiger Reserve-a Nature Tour nei turin EF&CC Complex, Champhai atangin vai liam an ni. 

He Nature Tour atan hian Higher Secondary School panga- GM HSS, Govt Champhai HSS, Eisteins HSS Champhai, Govt Khawzawl HSS leh Kawlkulh HSS te aṭanga naupang thlan mi 25 te leh official-te chu Dampa Tiger Reserve tlawh turin vailiam an ni a. Zirlaite hian Ni 24 & 25, March 2025-a Eco- Fest Dampa Tiger Reserve leh Aizawl Zoological Park a neih mek chu an hmanpui nghal dawn a ni.

Flag off programme-ah hian Pu Lalbiakchama Chawngthu, DFO Champhai leh Member Secretary- Nature Learning Centre Advisory Board ni bawk chuan zirlaite fuihna thu sawiin, he Nature tour-in a tum te hre renga an thilhmuh leh zirchhuahte atanga ramngaw leh nungcha humhalh kawnga midangte zirtirtu nithei ngei turin  a chah a. Tin, NLC hnuaia hmalakna hrang hrang leh hmachhawpte a tarlang bawk.

 Nature Learning Centre-Mizoram hi kum 3 chhung project niin Champhai Forest Division hnuaiah kalpuimek a ni a. National Action Plan on Climate Change (NAPCC) hnuaia mission pariat zinga pakhat-National Mission on Himalayan Studies (NMHS) atangin fund hi hmuh a ni.