Art & Culture Minister Pu PC Zoram Sangliana’n vawiin khan Kolasib Diakkawn YMA Library, ‘NAUBAN’ hriatna buhzem chu Ribbon chep chatin a hawng.

Nauban Library hi Diakkawn YMA Hall chhungkhungah chhawng khata sak a ni a. Rajaram Mohan Roy Foundation Fund hmanga sak a ni a. A dung 60 ft leh a vang 30 ft a ni a, sak zawh nan hian Rs 6,29,588/- sen a ni. Library din tur hian Diakkawn YMA chuan kum 2010 khan library recognition sawrkar atangin a hmu a, hemi hnu lawk hian Art & Culture Minister Pu PC Zoram Sangliana, Kolasib bialtu MLA puihnain hna thawh zui nghal a ni.

Hawnna thu sawiin Pu Ramsanga chuan, tun sawrkarah hian Central puihnain Library 58 lai sak zawh a ni tawh a. Tun hma lama hetiang atana sawrkar laipui puihna a awm tih hriat ngai loh kha tun sawrkarin kan zuk hmu chhuak hi a lawmawm hle a ni, a ti a. Kan thalai, kan tu leh fate tana inzirna tak tak a nih theih nan a enkawltu YMA te hian tui chilh a tul hle a. Tunlai thiamna sang chho zel mila Computerised tur te pawha tan in lak ka duh a ni, a ti a. A tul angin Computer pawh Deptt. atangin kanla rawn ngaihtuahsak dawn che u a ni, Minister chuan a ti a ni. Printing & Stationary hnuaiah khawpui ber bera an hman ang khawl changkang bun tura tan an lak dan Pu Ramsanga chuan sawiin cheng 875 vbc senna tur Detail Project Report, Central sawrkara an thehluh atangin 825 vbc an rawn sanction a. Chumi hmang chuan tunah hian khawl ropui tak tak kan chah thleng ta a. Hei hi Mizoram tana thil chhenfakawm tak a ni chho dawn a ni, a ti bawk.

Library hawnna inkhawm Library building-a neih hi Pu J Dengliana, President, YMA, Diakkawn Branch-in a kaihruai a. Pu R. Lalramchhana Secy chuan technical report a pe a. Pu CT Mawia, Chairman, Diakkawn Hall Comtt. chuan lawmthu sawiin hun a khar a ni.

Pu PC Zoram Sangliana chuan Diakkawn YMA te chu Library tih changtlun nana an hman atan cheng nuai khat he hunah hian a pe a, Minister hi a nupui Pi Lalthlamuani’n a tawiawm a ni.