1483/2024-2025

Dated Serchhip, the 7^th August, 2024: Vawiin chawhma khan Serchhip Addl SP Pu Saidingliana Sailo kaihhruaiin a pisaah police te, Judicial lam hotute leh Women &Child Development official-te an thukhawm a. Serchhip District chhunga naupang venhimna chungchanga thawhhona tha zawk a awm theihna turin meeting an nei a ni.

Sawrkarin naupang himna a ngaihpawimawh avangin humsual an dai lohna tur leh thil tha lo an chunga a thlen lohna turin dan a zam a, anmahni venhimna ngaihtuahtu Department te leh khawtlang mipui aiawh mi langsar te telna Committee a din a. Heng department peng hrang hrang te leh mipui mimirin thawhhona tha zawk an neih theihna tur te, vantlang mipui ten naupangte dikna chanvo humhim a pawimawhzia leh an laka pawi khawihtute chunga hremna lek kawh a nih theih dan zau zawka an hriat theih nan vawiin meeting hi neih a ni a. Juvenile Justice Board (JJB) te, Child Welfare Committee (CWC) te, Special Juvenille Police Unit te leh District Child Protection Unit (DCPU) te an tel a ni.

Juvenile Justice (Care and Protection of Children) Act hnuaiah hian naupang thilsual ti emaw enkawl leh venhim ngai buaipuitu police te hi uniform hak a rem ti lo a, kutkawl (handcuff) bun tir phal a ni lo a, Jail ah emaw Thana-ah zan riah tir phal an ni lo. Naupang te tan bika din Special Juvenille Police Unit hi District tinah dah a ni a, naupang thilsual ti buaipui ngai leh venhim ngai te hi heng SJPU a tel te chauh hian an khawih thei a ni. Naupang kum 18 hnuai lam thilsual ti te chungchang bik hi Court puitlingah ngaihtuah a ni ngai lo a, Juvenile Justice Board (JJB) te kutah dah a ni. Child Welfare Committee (CWC) te hian naupang kum 18 hnuai lam enkawl leh venhim ngai bikte chungchang an ngaihtuah thin a. Vawiin meeting ah hian official te, police te leh committee peng hrang hranga member te tih tur inhrilhhriat tharna leh naupang enkawl leh venhim dan tur rawtna hrang hrang an neih te an sawi ho a ni.