1183/2024-2025

Dated Aizawl, the 15th July, 2024: Nimin ni 14.7.24 Pathianni chawhnu khan Chief Minister Pu Lalduhoma chuan Mumbai Mizoram House tlawhin thawktute leh damlote nena inkawmna an nei a. Navi Mumbai-a kum 2013 a sak tan tawh, vawiin thlenga la zawh loh Mumbai Mizoram State Guest House & Emporium satu tur a thara ngaihtuah a nih tur thu a sawi.

Ni 2 September, 2008 khan City and Industrial Development Corporation of Maharashtra (CIDCO) chuan Plot No. 9, Sector 30A Vashi (Navi Mumbai) hi Mizoram sorkar a pe a. A lease period hi kum 90 a ni a, a ram zau zawng hi 1983.48 Square Metre a ni. Developer/Builder te nena hma laa kalpui phawt turin Mizoram sorkarin ruahmanna a siam a. Builder Company pakhat US Roofs Ltd. nen ni 30.1.2009-ah Agreement sign a ni ta a ni. US Roofs te hian full premium Rs. 3.8 crore chu Managing Director, CIDCO-ah Mizoram sorkar hmingin an pe a. Ni 9.3.2010-ah Mizoram sorkar leh CIDCO hian Agreement an sign zui a. Agreement ang chuan Mizoram sorkar-in he plot hi State Guest House & Emporium atan a hmang ang a, thil dangah a hman phal a ni lo. Tin, Agreement sign atanga kum 5 chhungin a sa zoin a luah fel tur a ni. Hemi hun chhunga a sa zo hman lo a nih chuan additional premium pek belhin a sa chhunzawm thei ang.

Mizoram sawrkar hian US Roofs nen Agreement a siam hmasakah khan Building chhunga Mizoram chan (space) a zim lutuk nia a hriat avangin Development Agreement (Revised) ni 2.6.2011 khan a sign pui leh a. Hemi Agreement ang chuan Mizoram sawrkar in space a chan tur chu 9500 Sq. Ft a ni ang. Hei hi a ratio chuan 25:75 a ni. Builder lam chuan 75% an chang ang a, retention period kum 75 an nei ang. Builder lamin an chan 75% hi sumdawnna hmun (commercial use) atan a hman tur - tih a ni.

Ni 1.3.2013 khan khatih laia Mizoram Chief Minister chuan Foundation stone a phum a, sak hna pawh tan nghal niin foundation piling works engemaw zat an zova. Mahse hemi kum hian Mizoram House an sak ang chiaha US Roof ten an sak Arunachal Bhawan chu CIDCO lamin objection an neih avangin Mizoram House sak kal lai pawh chu US Roof hian an chawlhsan lailawk a.

US Roofs hian hmalakna an kalpui muang em em a kum 5 chhungin an zo hman ta lova. CIDCO hian US Roofs te hi kum 2 dang (9.3.2015 — 8.3.2017) extension fee pe turin a ti a, mahse an pe duh lova. Ni 08.03.2019 khan extension fee pea sak chhunzawm turin CIDCO hian a remtihsak nawn leh a, chu pawh chu US Roofs te hian an pe duh ta chuang lova ni. 

Kum 2021 ah DRC Mumbai hian Mizoram sawrkarin ti tura a tih angin CIDCO hnenah Building 75% lai US Roofs ten Commercial atana hman tumna awm mek hi an ngaihdan a zawt chiang a. Reminder te a thawnleh thin pawhin vawiin thlengin chhanna hmuh a ni ta rih lo a ni.

Chief Minister chuan, "Hetianga US Roofs ten Mizoram sawrkar nena kan inremna bawhchhiaa muang taka hma an lak avang hian Assembly Committee pawhin kan zu tlawh tawh a. Sawrkarah rawtna te pawh kan thlen a. Tin, Mumbaia cheng Mizote leh damlo zu kal te pawh an mangang thin hle a, kum telin Mumbai pantu kan pung zel si a. Chuvang chuan kan sawrkar chuan ngaihtuahna thar sengin Law & Judicial Department ten zirchianna te an neih hnuah US Roofs nena Agreement hi tih tawp a, tha thara a satu tur zawn ni se. CIDCO in min pek dan ang tak leh Mizo mipuiten hlawk zawka kan hman tangkai theih ngei tura sak ni se kan ti ta a ni", a ti.

Agreement tihtawp tura thutlukna hi Mumbai a zin hmaa an siam a nih thu pawh a tarlang a ni.

Chief Minister hian Mumbai Mizoram House-a Cancer enkawl lai awm mek te chu Rs. 200000 in a kan a ni.