Vawiin khan Sports &Youth Services Minister Pu Zodintluanga, Mizoram State Sports Council President ni bawk hovin a pisaah State Sports Council General Body Meeting neih a ni.

He meeting-ah hian nakuma Mizoramin North East Games  a thlen dan tur thlirin a kaihhnawih thil pawimawh chi hrang hrang an ngaihtuahho a. Sports Discipline hrang hrang neihna tur hmun duan lawk sawi hovin, hetiang hian an rel a: Athletics bik hi Rajiv Gandhi Stadium, Mualpuiah; Badminton chu Government Mizo Higher Secondary School Indoor Stadium-ah; Football chu Lammual leh Rajiv Gandhi Stadium, Mualpuiah; Judo chu Pitartetlang Mini Sports Complex chhawng chung berah; Weightlifting chu Pitartetlang Mini Sports Complex 1st Floor-ah; Table Tennis chu Kulikawn Indoor Stadium-ah; Boxing chu Lammual emaw High School Field, Zarkawtah; Wrestling chu Pitartetlang Mini Sports Complex 2nd Floor-ah; Volleyball chu Lammual Volleyball Court-ah; Taekwondo chu Electric Veng Indoor Stadium-ah; Hockey chu Vaivakawn Jt. YMA Field leh Ramhlun Sports Complex-ah neih ni se tiin an rel.

Infiamna hmun tur an sawiho bakah Meeting chuan North East Games Organizing Committee, Chief Minister Chairman-na hnuaiah din nise tiin a rel a. Working Chairman atan Sports Minister Pu Zodintluanga;Vice Chairman atan Parliamentary Secretary Pu S. Laldingliana, Chief Secretary Pu Van Hela Pachuau lehState Sports Council  Vice President Pu F. Rotluanga; Secretary ah Sports &Youth Services Secretary Pu R. Lalvena; Joint Secretary-ah State Sports Council Secretary Pu Lianzuala, Mizoram Olympic Association Secretary General Pu Zoliana Royte leh State Sports Council Jt.Secretary Pu John Kima; Treasurer-ah State Sports Council Finance Secretary Pu Rosangliana te ruat an ni a. Organising Committee hnuaiah Sub-Committee pawimawh engemawzat din a ni dawn a, Sub Committee Chairman leh OB dangte chu Organising Committee ruat tura dah a ni.  Sports Council chu North East Games neih tura sum mamawh tlangpui chhut chhuaka Organising Committee Meeting neih hmasak bera ngaihtuah atana chhawp chhuak tura hriattir an ni bawk. North Eastern Council (NEC) hnena thlen tur North East Games atana infiamna hmanrua leh Infrastructure mamawh thenkhat dilna tur chu Minister hian Meeting hmaah chhiar chhuakin sawiho zui nghal a ni bawk.