North eastern Develoopment Finance Corporation Ltd.(NEDFI) chuan vawiin khan Sub-Hqrs YMA Hall, Venglai-ah Lunglei khawchhunga sumdawng mi (entrepreneurs) ten tan 'Business Meet' a buatsaih.

He Business Meet-a kalkhawm hmaah thusawiin NEDFI Lunglei Branch Manager Pu Lalhruaizela Fanai chuan NEDFI hmalakna hrang hrang leh scheme neihte a sawifiah a. NEDFI chuan loan nia 100 aia tam lovah chuan kum khatah 8% chauha pung awmin loan an puk tir thin thu a sawi a, a pung zat pawh sum la bat atanga thlatina an chhut thar zel thu a sawi bakah Bank dangte nena khaikhin chuan an interest rate chu hniam tak a nih thu a sawi bawk. NEDFI chu DONER Ministry hnuaia a awm a, chu chu sorkar Laipuiin hmarchhak biala mite a duhsak em avanga interest hniam taka loan pek chhuak thei a nih thu a tarlang a. Industry dinte leh sumdawngte chuan bank dang an dawr hmain NEDFi chu dawr phawt thin turin a chah bawk.

He Meet-ah hian General Manager, DIC, Lunglei Pi Lalrodingi chuan Industry Department hmalakna te leh NEDFi chu mipuiin chhawr tangkai thiam se a duh thu a sawi a. He hunah hian NEDFi Aizawl Branch Manager Pi Lalthianghlimi, Fashion Designer Pi Lalnunpuii Hrahsel leh Flex Banner khawl neitu Pu Lalremsanga Chawngthu ten an tawn hriat thil hrang hrang kalkhawmte hmaa tarlangin zawhna leh chhanna hun pawh hlawk taka hman chho a ni.