North Eastern Development Finance Corporation Ltd. (NEDFi) Aizawl Branch leh Sesawng Branch, MHIP te buatsaihin Sesawngah ni 18 May - 1 June, 2011 chhung khan Balhla kung atanga kut themthiam thil (handicraft) hrang hrang siam dan zir a ni a. He Skill Development Programme kharna hi nimin khan hman niin Pu P.L. Thanga IAS (Retd.), Member Secretary, Mizoram Planning Board chu Khuallian a ni.

Pu P.L. Thanga chuan kan chhehvela kan hmuhtheih mai hmanrua atanga kut themthiamna hmanga thil hrang hrang siamchhuah chu tha a tih thu a sawi a. Hmanrua lei chawp ngai lo leh a thlawna an hmuh theihte chu chhungkaw chawm nan a hlawk thei ang bera hmang tangkai turin training-a kalte a fuih a. NEDFi chuan thilsiam dan zirna chauh ni lovin a hralhna thlenga an buaipui avangin kut themthiamna hmanga eizawnna a tisawt ngei ang tih a sawi bawk.

Pu Ashim Kumar Das, Asst. General Manager, NEDFi, Guwahati chuan heng kut themthiamna hmanga eizawngtuten an thilsiam an hralh zung zung theihna atana NEDFi hmalakna te a sawi a. Thil siam chhuah a tama a that phawt chuan kawng a inhawng zau a ni tih sawiin tanpuina an pek zel theih tur thu a sawi a. He training-a kalte hian inpekna nen a taka hma an lak a tul tih a sawi bawk.

He ni 15 chhung awh training programme-ah hian Sesawng khua atangin hmeichhia 24 an tel a. Balhla kung atangin hmanraw chi hrang hrang - pher, ip, lukhum, vawthlep, bur leh thil chi hrang hrang siam dan an zir a. NEDFi hian Sesawng MHIP hnenah hian a mamawh apiangte hman atan Loom, Ratt Machine leh 31 K Stitching machine an pe bawk a ni.