New Economic Development Policy – Entrepreneur Development Scheme (NEDP-EDS) hnuaia 4th – 28th September, 2017 chhunga buatsaih “Entrepreneur Skill Development Programme on Construction Supervisor Course” chu vawiin khan khar a ni a, Pu H.Liansailova, Vice Chairman, Mizoram State Planning Board in kharna hun hi a hmanpui.

Training kharna inkhawmah Pu H.Liansailova chuan thalai te mahni kutkea an din theih nan leh entrepreneur te hmasawn nan sorkarin hma a lak zel tur thu a sawi a. Training chhuak thar te midang tana entawn tlaka an zirchhuah te chhawr tangkai tur a fuihin, tunlai khawvelah hmangchang hriatna hi hmasawnna rahbi pawimawh tak a ni a ti a, training a an zir te a taka hmang chhuak ngei turin a fuih a. Ram hmasawnna kal zelah construction sector ah hna tam tak a awm zel dawn a ni tiin, hemi chungchangah an hriatna te tat hriam a rinawm tak leh taima taka hnathawk turin training chhuak thar te hi a fuih a. Nitin inhlawhfakna hmuh duhtawk mailova, hausakpui tham hna an thawh theih nan leh ram leh hnam tana mi chhenfakawm an nih theih nan tang sauh sauh turin a fuih bawk a. Mizoram economy ngelnghet siam a, ei leh bar intodelh kawnga hma kan sawn theih nan kan thiamna leh remhriatna a taka hmanchhuahpui hi kan tum ber tur a nih thu Pu H.Liansailova chuan a sawi a ni.

Entrepreneur Skill Development Programme on Construction Supervisor Course training hi Entrepreneurship Knowledge Centre (EKC), ZIDCO ah neih a ni a. He training-ah hian Mizoram hmun hrang hrang atangin lehkhathiam rual mi 20 kum 20-50 inkar inziaklutin, training-ah hian Insak leh kawng laih chungchanga hnathawktute enkawltu (supervisor) in a hriat tur tul ang angte zirtir an ni a. Civil engineer te, Architect te, Surveyor leh Disaster Management lama expert ten practical nen zirtirna hi an pe a ni.

Training kharna inkhawm hi EKC, ZIDCO-ah neih niin, Dr.C.Vanlalramsanga, Secretary, Planning & Programme Implementation Department & Alternate Chairman MEDMOC in a kaihruai a. Pu Joseph L.Ralte, Centre Director, EKC in training report a pe a, training chhuak ta te chu an hmasawn dan an enthlithlai zui reng tur thu a sawi a ni. ZIDCO Chairman Pu Lalrobiaka’n training chhuak ta te fuihna thu leh lawmthu sawina in hun hi a khar a ni.