Vawiin khan Sawrkar economic kalphung thar – New Economic Development Policy (NEDP) leh Aizawl khawpuia lirthei tawt lutuk tih ziaawm nana ruahmanna thar – Traffic Jam Free Aizawl City Programme te tlangzarhna ‘Grand Launching’ chu Vanapa Hall-ah neih a ni a . He programme hi Chief Minister Pu Lal Thanhawla chuan khuallian niin hmanpui a, NEDP chu Mizorama ei leh bar, sum leh paia intodelhna thlen zeltu leh hei hi Mizoram mipuiten rinawmna, dikna, taimakna leh Pathian tihna nung nen dawnga, Pathianin a zahngaihna leh malsawmna in a vur a, Pathian tih ropuina atan leh Mizo hnam chu hnam zahawm leh ropui a a dinchhuah theihna turin a NEDP chu a tlangzarh a. He programme ah hian Home Minister Pu R. Lalzirliana’n Traffic Jam Free Aizawl City chu a tlangzarh bawk a ni. 

Chief Minister Pu Lal Thanhawla chuan New Economic Development Policy chuan awmzei neia chak zawka ei leh bar, sum leh pai lama intodelhna thlen chu a tum anih thu sawiin ei che che leh nung che che  economy subsistence economy atanga market lamah hralhchhuah tur atana tharchhuah tihpun leh tam zawk neia market economy-a Mizoram hruailuh chu a tum pawimawh berte zinga a mi a ni, a ti a. Intodelhna piah bakah sawrkar inrelbawlna tha zawk adminstrative reforms kenkawh te, sawrkar sum leh pai enkawlna kawnga ruahmanna tha zawk duanna atana public financial management kalpui te, ram hman leh enkawl kawnga kalphung tha zawk duan anih theih nana land reforms buaipui te leh skill development hmanga thalaite tan eizawnna kawng tam zawk zawn leh ruahman te chu NEDP hian a huam thu a sawi a. NLUP in hlawhtlinna tam tak a hrinchhuah thusawiin NEDP chu NLUP chhunzawmna a ni, a ti a. NLUP a hlawhtling tak tak te chhawmdawl leh tanpui ngai la awm te tanpui chu NEDP tum anih thu te sawi bawk. Thalai thiamna leh tumruhna nei dinchhuah tum te, entrepreneurs te, mi hausa leh mi neinung te chu NEDP a working partner te ni tura sawmin an thiamna leh an sum te chu kuthnathawktute tan leh tharchhuah tihpunna kawnga an sum te pei pung turin a sawm bawk a ni. 

Chief Minister chuan ruahmanna leh programme te chu eng anga tha pawh nise mipui lamin kan zir loh a, kan dawnsawn dan a dik loh chuan hma lak tak tak a har thu  leh hlawhtlinna tak tak hmuh a har thusawiin ram leilung faten neitu rilru pu a, he programme hi kan ta theuh a ni tia kan dawnsawna chutianga kan rilru leh kan ngaihtuahna te hi kan buatsaih theuh a ngaiin a pawimawh a ni, a ti a. Heti khawpa ram tha, sik leh sa duhthusam nei chunga tun thlenga enga mah kan la nghianghnar lo te hi tu mawhphurna nge tia kan ngaituahchian leh kan chik a ngai, a ti a. Traffic jam chungchang sawiin Chief Minister chuan Aizawl khawpui chhunga lirthei tawt lutuk leh kan kawng neihte a chep lutuk chhan chu duhamna avang leh thenawm khaw vengte leh vantlang te pawisa lova duh duh naa lirthei kan hun leh dah vang anih thu te sawiin hetia kan tih hian mite tan kan hnawksak em tih hi kan ngaihtuah chian a hun tawh takzet a ni, a ti. 

Home Minister Pu R. Lalzirliana chuan Traffic Jam Free Aizawl City ruahmanna chu tlangzarhin he thil hi thil thar a nih loh thu te, Sawrkar hmasa ah pawh hmalakna leh ruahmanna eng eng emaw a awm tawh thu te, AMC leh veng thenkhata Local Council te pawhin heng ang ruahmanna hi an kalpui tawh thu te a sawi a.  He thil hi thil harsa leh awl lo tak a ni a, mahse harsatna paltlanga hlawhtlinna hi a daih reiin a dik thin a ni, a ti. Aizawl khawpuia traffic jam hian tupawh min nghawng a, a tih ziaawm nana ruahmanna kalpui tur hian mirethei a nghawng dawn lova, khawpui laili a awm lirthei dahna nei lo ten khawpui daia awm mi harsa zawkte ram an hawh a ngai dawn a, hei hian an tan  malsawmna a thlen theih dawn thu a sawi a ni.  

He programme khuhhawnnaa thuhmahruai sawitu Finance Minister Pu Lalsawta chuan NEDP hi sawrkar kum kal mek 2016-2017 atanga hman tan nghal tur a nih thusawiin kumin atana sum ruahmanna chu cheng nuai 2500 a ni a, NEDP mamawhna leh a tulnaah chuan Sawrkarin NABARD leh hmun dang atangin loan kan la ang, a ti a. Market economy atan tharchhuah nghah leh neih tam a tul thu sawiin hemi atan engkim chu sawrkarin kuthnathawktu te a tihsak dawn lova, awlsamna te, mamawh intawm infrastructure siam te, kawng kawhmuh te siamsakin an mamawhna phuhruk nan Sawrkar chu a tlan chhe dawn lo a ni, a  ti.  NEDP chu NLUP hrinchhuah anih thusawiin Finance Minister chuan NEDP hnuaia ruahmanna te hi tanpuina ni mai lovin tang te puihna a ni, a ti bawk. 

Programme kaihruaitu Vice Chairman, State Planning Board Pu H. Liansailova chuan NEDP hi ram hruaitu ten tunlai khawvel mamawh ngaituaha hma thlir thui tak neia an ngaihtuahchhuah leh Mizoramin hmasawnna kawng chak leh zawka kan zawh theih nan duan a nih thu a sawi. 

He programme ah hian State Planning Board Member Rev. Dr. K. Thanzauva chuan hunserh a hmang a. Pu P.C. Lalhmingthanga, Mayor, Aizawl Municipal Corporation (AMC); Chief Secretary charge la mektu Principal Secretary Pi Renu Sharma; Prof. Lianzela, MZU, Commissioner Lalkiamlova, Salvation Army leh Pu H. Lalthanzuala, All Mizoram Farmers’ Union (AMFU) ten thu an swi bawk a. Environment, Forest & Climate Change Minister Pu Lalrinmawia Ralte in lawmthu sawiin programme kharna a nei a ni. 

Vawiin programme ah hian Mizoram Assembly Speaker Pu Hiphei, Minister-te, Parliamentary Secretary-te, MLA-te, AMC Councillor-te, Secretary-te leh Sawrkar hotulute, senior officer te bakah mipui thahnem tak an tel a ni.

Theihna leh remchanna hrang hrang neih vete leh mamawhte hre rengin Mizoram Sawrkar chuan  Chief Minister zahawm tak kaihhruaina hnuaiah hmasawnna tha zawk leh tluantling, mahni ke a ding thei tur ram economy chak zawk din theihna tur 'New Economic Development Policy - Comprehensive Growth Strategy' a rawn chhawpchhuak ta a ni.

NEDP thiltumte tihlawhtling tura a taka hma lak a nih theih nan leh NEDP thiltumte chiang lehzuala inhrilhhriat a nih theih nan vawiinah hian NEDP khuhhawnna (launching) hun hman a lo ni ta a, Mizoram chu thawhchhuah ngah ram kan nih zawk theihna turin NEDP hmangin Sawrkarin hma a la dawn a. Economy chak zawka than tir tura thar chhuah tihpun, employment tam zawk siam chhuah, mipui sum dinhmun tihchangtlun, kan thar chhuahte awlsam leh man man zawka kan hralh chhuah theihna tur te, sumdawnna kawng tihhmasawn leh mipuite tana service a lo that zawk na tur kawnga ruahmanna tha leh chak zawk buatsaih chu he NEDP in a tum a ni. Sector hrang hrangte'n rualkhai taka hma an sawn theihna tur atana ruahmanna chu he policy hian lakhawmin a khaikhawm a ni. Chak tak leh mitin thleng pha economic a hmasawnna tur atana thil pawimawh hmasate (priorities) pawh a keng tel a ni.

 NEDP thiltumte tihhlawhtlinna turin a thawhkhatna atan Scheme leh  projects 27 chu State Plan Fund atangin 2016-17 chhunga thawh tur NEDP Core Committee chuan a pawm fel tawh a. Heng bakah hian project leh prgramme/scheme dangte pawh hun remchang hmasa leh kum lo la kal zel tura ngaihtuah leh thawh chhunzawm turte pawh chhawpchhuah mek zel a ni.

Tih thin dan thlakin tihdan thar nen NEDP hi mipui nena thawkhova hlawhtlin theih beiseiin Sorkar chuan a chhawpchhuak a. Sawrkar sum hi duh ang tawkin tam lo mahse, a tam lam aiin a neih chhunte hman ang chin chin hian a tak ram a thlen chuan NEDP hmangin Mizoram hi siam that ngei Sawrkar chuan a beisei a ni.

Traffic Jam Free Aizawl City Programme ruahmanna ah hian hmathlir 5 a awm a; chungte chu : Aizawl khawpui traffic jam tih reh a, hun tlem zawka inkalpawh zung zung te; Aizawla lirthei tam avanga boruak chhia mipuiin kan hip luh natna tam tak hi lirthei tih tlema khawpui hrisel zawk neih te; mipui tu tan pawha englai pawha hman theih lirthei chuanna (Public Transport) buatsaih te; zanlai leh vartianah pawha koh theih reng lirthei hman tur buatsaih te  leh englai pawha kal duhna apianga lirthei hman tur a awm avanga ram changkang te anga mimal lirthei neih tlem tial tial te a ni.

Naktuk October ni 1, 2016 atangin nakum November ni 30, 2017 thleng (ni 426 chungin) lirthei chi hrang hrang two wheeler leh JCB te pawh tiamin a neitute a dahna tur garage an nei vek turah tih an ni dawn a. Hemi atan ni zat lak bak chu nitin media leh chanchinbu hmanga puanzar thin a ni dawn a. December ni 1, 2016 atang hian he ruahmanna kalpui a nih dante hi Chief Minister emaw Home Minister emaw hoa a khat tawkin thlirlet thin a ni ang. Mizorama koh thei taxi (radio taxi) service tir dan te pawh he ruahmanna hnuaia hian ngaihtuah a ni ang a. Hemi hun chhung hian Aizawl khawpuia kawng remchang lo siamthat hna te thawh a ni anga. Traffic Police, AMC, Local Council te hmangin April ni 1, 2017 atangin lirthei dahna nei leh nei lo endik tan a ni ang. He ruahmanna ah hi Home, Transport, PWD, UD&PA, P&E leh LR&S Department-te; AMC, Aizawla Local Council-te, BSNL leh tlawmngai pawlte an thawhho dawn a ni.