Vawiin khan Lawngtlai District Level Committee under My Project, My NEDP - Mipui Mamawh Intawm Ruahmanna (MiMIR) chu an Chairman, Lawngtlai Bawrhsap Pu N. Chakhai MCS hovin a office chamber-ah an thu khawm a. NEDP MiMIR hnuaia project top 10 te thlir hovin, district winner an thlang chhuak.

MiMIR hnuaiah hian Lawngtlai District chhunga khua/veng hrang hrang atangin project proposal 44 a lut a. He'ng project-te hi MiMIR inkaihhruaina zulzuia uluk taka endik leh thlit fim a nih hnuin, August ni 10 khan a tha zual 10 thlan chhuah a ni a. He'ng project top 10-a thlan chhuah khaw sawm zinga khaw pariat chuan nimin khan Committee hmaah an project nihphung an sawi fiah a. Khaw pahnih erawh an inhnukdawk a ni.

Vawiina screening commitee thu khawm chuan he'ng project pariat te hi ngun taka buka an khaikhin hnuah, Sangau khuain project an siam, Phawngpui tourism development project chu project tha berah thlangin, district winner-ah puan a ni.