Vawiin hian Serchhip District MJA Member te chuan NEDP Multimedia Publicity Campaign hmalakna kal zelah Serchhip District chhehvela sawrkar hmalakna thenkhatte tlawh kual turin Pu K. Saitluanga, Serchhip IPRO hovin an zin chhuak.

MJA Tour te hian vawiin hian Biate panin Biatea ni 100 inah Biate khaw tana tuilak hna PHE, Serchhip WATSAN Division kaltlanga thawh mek an en a. He tuilak hi Tuipui lui pump tura hmalakna niin Rs. 1364.67 lakh senna tur, NERDP sum hmanga thawh ani. Kum 2015 based year a hmanga kum 30 chhung nitin mi pakhat tana tui Litre 135 dawng thei tura chhut ani a. Contractor hi Pu H. Sanga, Aizawl Chanmary ani a, hna hi za zela 50 vel thawh zawh tawh nia sawi ani. Tuipui leh Biate tlang tui dahkhawlna tur hmun insan hleih zawng hi 960 mtrs niin, a hlat zawng hi 6.7 kms a ni. Nitin darkar 20 pump theih tura ruahman ani bawk. Tin, hnathawh zawh hun tura ruahman hi June, 2019 ani.

Hemi zawh hian Biate khawtlang hruaitute nen inkawmna nei zui nghalin faina lama khawtlangin hma an lak dan inhrilhhriatna, inkawm hona neih ani a. Biate VCP Pu RV Hluna’n inkawm hona hi kaihruaiin Village Council members te, YMA, MHIP, MUP leh MZP te bakah Biate khawtlangin faina lama Brand Ambassador pathum te an tel a. Biate in tunhma atanga faina lama hma an lolak tawh dan leh an hmachhawp hrang hrangte sawi hona hun neih ani.

Kan hriat angin Biate hi nikuma Mizorama khawpui fai inelnaah notified town inelnaah pakhatna an nih hnuin kumin inelna, nimin maia puanah pawh pakhatna an la leh ani.

Biatea hun an hman zawh hian E. Lungdarah SDO, PHE E. Lungdar Pu Samuel LR Ralte te nen E. Lungdar Multi Village Water Supply Scheme hmalak tur ruahmanna te sawihona hun an hmang leh a, tlaiah N. Vanlaiphai panin, naktuk lamah N. Vanlaiphaia Agriculture Department hmalakna te an en leh dawn ani.

Biate leh E. Lungdara PHE Department hmalakna an enkualna hi Pu V. Lalvuana, JE, PHE, E. Lungdar Sub Division in a lo dawngsawng ani.

Tun tuma MJA member zinchhuak te 7 an ni.