Vawiin khan NIB Conference Hall ah NEDP – NLUP Convergence Scheme Phase – II (2017-2018) kalpui dan tur sawihona neih a ni a. he sawihona hun  hi Pu PL Thanga IAS (rtd), Vice Chairman, NLUP Implementing Board-in a kaihruai a, NLUP Line Department aiawhte an tel a ni.

NEDP – NLUP Convergence Scheme Phase – II (2017-2018) atan hian NLUP Cluster 40 a beneficiary 16,400 thlan an ni a. Line Department tinte hnenah beneficiary te hming, sum dawn tur zat leh tul dangte pek an ni a. NEDP – NLUP Convergence Scheme guideline siam tawh sa dungzuiin kalpui tur a ni. Trade thenkhat a ennawn ngai awmte erawh chu a changtu Line Department ten review na neiin, siam that tura rawtna hi July ni 4, 2018 ah peihfel nghal vek tura tih a ni.

NLUP beneficiary thenkhat bank account number leh anmahni biak pawh theihna tur telephone number thehlut ve lo tlem an awm a. NLUP atana tanpuina pawisa semchhuah nghal tura rel anih angin bank account number leh telephone number la pe lo ten pe nghal tura hriattir nise tia rel a ni.

A tlangpuiin beneficiary tin te hi Rs. 1,00,000/- theuh pek tur an ni a. 1st Installment ah a chanve (50%) vel pek tura ruahman an ni. Auto Rickshaw man erawh chu Rs. 1,00,000/- chuang anih avangin Auto Rickshaw trade thlangtute erawh chuan Rs. 1,00,000/- baka sum mamawh thawh ve tura an inhuamna leh ruahmanna Director, Transport Department ah ziakin an hriattir tur a ni.

1st Installment atana sum mamawh Rs. 82 Crore (vaibelchhe 82) hi Line Department te account a lut turin ruahmanna peihfel a ni tawh.

Bank in a huam phak chin khuaa mi beneficiary te hnenah NLUP kalphung pangngai angin anmahni bank account kaltlang a tanpuina sum hi pek tur an ni.

NIB thuchhuak angin in District tin a DC hnenah District Level Bankers Committee meeting kova, Bankers leh Line Department hotute nen thukhawm in Bank in a a huam phak loh khua te tihchian a, heng khua a beneficiary te sum fai a pawisa pek dan tur ruahmanna an siam ang. Hemi chungchangah hian DC tin hnenah instruction pek an ni tawh bawk.

NLUP lo kalpui tawh dan angin beneficiary zawng zawng ten an sum dawn dik taka hmang tura thutiamna (undertaking) siam a ngai a. Hnathawh dan tur work order leh sanction order a in ziak anga ti lo beneficiary ten 2nd installment an dawng thei dawnlo a ni..