Vawiin hian Lawngtlai BNRGSK Hall-ah Lawngtlai District chhunga Northeast Region Textile Promotions Scheme (NERTP-S) hnuaia Pangang khawi tura thlan chhuah chhungkaw 50 te tan training buatsaih a ni.

He training hi Pu B. Lalchhuana, Lawngtlai District Sericulture Officer in a kaihruaiin loneitu kalkhawmte chu Pangang vulh hlawhtling tura hmalak dan tlangpui a hrilhfiah a. Dr. L. Pachuau, Scientist C, Research Extension Centre, Central Silk Board leh Pu Lalthankima, Sericulture Promotion Officer, Sericulture Training Institute, Zemabawk ten thiamthil leh thil tur chi hrang hrangte, Thingtheihmu leh Pangang natna enkawl dan te chipchiar takin an zirtir bawk a, loneituten zawhna an neih apiangte hrilhfiahna hun buatsaih a ni bawk.

Lawngtlai leh a chhehvel khua Rulkual, Vanhne, Sihtlangpui, Kawlchaw, Thingkah leh Diltlang South atanga thlan chhungkuate chu Pangang vulh dawna hriat tur tul leh tih ngai chite chipchiar taka zirtira, a lem nena entir zel an ni a. Naktuk leh Naktip lamah phei chuan an thil zirte a taka khawih turin Thingkah khua Pangang vulha eizawng mekte huan leh Rearing House te an tlawh nghal ang.

Sawrkar laipui Ministry of Textiles Programme pakhat, Integrated Sericulture Development Project hnuaia India hmarchhak tana buatsaih Northeast Region Textiles Promoton Schemes hnuaiah hian kum 2014-15 chhung khan Aizawl, Lunglei leh Champhai District ah te hmalak tan a ni tawh a. Kumin atang hian Lawngtlai District ah hmalakna tan leh tur a ni. Hemi hnuaia enkawl tur bik thlanchhuah chhungkaw 50 te chu Thingtheihmu tin khat hmun nei tur leh kumtin Pangang Laying za zelin tum thum aia tlem lo vulh thei turin an zirtirin an tanpui dawn a ni.