3890/2022-2023
Aizawl the 17th March, 2023 : Vawiin khan Health, Commerce & Industries leh Higher and Technical Education changtu Minister Dr.R.Lalthangliana chuan New Delhi ah Ministry hrang hrang dawrin Mizoram mamawh te a thlen.

Dr. R. Lalthangliana chuan Shri B.B Swain, Secretary, Ministry of Micro, Small & Medium Enterprise, Govt. of India chu a pisaah a hmu a. MSME Scheme hnuaia Mizoram chhung District pali (4) a Flatted Factory Complex sakna (Construction) atana senso za zela sawmkua cheng vaibelchhe 44.8877 Sawrkar Laipuiin a sanction tawh release thuai turin dilna a Secretary hnenah hian a thehlut a. He Complex sakna tur atana Mizoram Sawrkarin a tum tur State Matching Share (SMS) cheng vaibelchhe 4.4901 chu Finance Deparment, Govt. of Mizoram chuan Administrative Approval March ni 9, 2023 khan a lo pe chhuak tawh tih Secretary hnenah hian a hriattir a ni.

Higher & Technical Education changtu ni bawk Minister Dr R.Lalthangliana leh Mizoram sawrkar Environment, Forest & Climate Change Minister Pu TJ Lalnuntluanga te chuan vawiin khan Union Minister for Environment, Forest & Climate Change Pu Bhupender Yadav an hmu a. He hunah hian Mizoram tana Environmental Clearance pe theitu body - State Level Environmental Impact Assessment Authority (SEIAA), July 18, 2022 a tawp tawh chu a body thar din (constitute) thuai turin an ngen a. SEIAA Body awm loh avang hian Kawngpui laih, mining/Stone Quarry leh a dangte tan Environmental Clearance pekchhuah kawngah harsatna lian tak Mizoram State chuan a tawh mek thu an thlen a. Hei bakah hian Lengpui hmuna National Institute of Technology (NIT) sak mek, Forest Clearance neih loh vanga tihtawp lailawk avanga harsatna chungchang thu an thlen bawk a ni.

Mizoram Commerce & Industries Minister leh Environment & Forest Minister te hian Director General of Forest (DGF) Pu Chandra Prakash Goyal an hmu zui nghal a. State Level Environmental Impact Assessment Authority (SEIAA) siam thar chungchang leh Lengpuia NIT building sak mek atana Forest clearance chungchang an sawipui leh a ni.

Commerce & Industries Minister Dr R.Lalthangliana hian Mizoram State Standing Counsel, Advocate Sidesh Kotwal pawh hmuin National Green Tribunal (NGT), Principal Bench, New Delhi in Environmental Clearance nei lo te Quarry khawih a phalloh avanga Mizoram a construction agencies leh quarry neitute harsatna tawh chungchanga NGT a appeal thehluh tur chungchang a sawipui a. Hemi kaihhnawih document pawimawhte chu Advocate sawipui a pek niin a rang thei ang bera NGT a one-time relaxation dil chungchang uluk takin an sawi dun a ni.

Ministry of Ayush-a Joint Secretary leh Mission Director ni bawk Pi Kavita Garg hmuin Dr R.Lalthangliana chuan Mizoram mamawh chi hrang hrang a sawipui a. Hei bakah hian Ayush Minister Pu Sarbananda Sonowal-a leh Ayush Ministry-a Secretary Vaidya Rajesh Kotecha te hnenah khum 50 leh khum 10 awm theihna tur Ayush Hospital engemawzat sakna atan a sum sanction thuai tura dilna a thehlut a ni.

Health Minister hian NITI Aayog Member (i/cHealth) Dr. VK Paul hmu lehin a hmaa a lo thlen tawh Mizoram mamawh hrang hrangte sawipuiin, Mizoram tana damdawi ina hman tur khawl pawimawh (MRI leh X-Ray) ngaihtuahpui rang turin a thlen a ni.

Dr. R. Lalthangliana hian Prof. Balram Bhargava, Chief of Cardiothoracic Centre, AIIMS, New Delhi chu a pisaah hmuin ZMC a Cardiology Department din a nih theihna atana thil pawimawh a sawipui a. Fund awmthei te haichhuak tura ZMC-in DPR an buatsaih chu Prof. Balram Bhargava kaltlangin Health Minister hian a thehlut a. Minister thu thlente a tul anga a lo bawhzui thuai tur thu ICMR Director General kalchhuak Prof. Balram Bhargava hian a lo hrilh a ni.

Dr. R. Lalthangliana chuan ZMC Administrative Block, cheng vaibelchhe 103 senga sak zawh tak hawng turin Union Health Minister Dr. Mansukh Mandaviya a sawm bawk.