2980/2024-2025
November ni 13, 2024: New Delhi a Yashobhoomi, Dwarka ah Union Power Minister Manohar Lal Khattar kaihhruaina hnuaiah nimin November ni 12, 2024 khan Conference of Power Ministers of States & UTs neih a ni a. He conference ah hian Mizoram Power Minister Pu F. Rodingliana pawh a tel a. Mizoram mamawh leh harsatna te a thlen a ni.
He meeting-ah hian India rama Power sector hnuaia hmasawnna hnathawk mekte leh hmachhawpte sawihona neih niin, Power Minister Pu F Rodingliana pawhin kawlphetha siamchhuak leh pek kaihhnawih a Mizoram dinhmun leh harsatna tawh rang hrang te a thlen a. Power Minister hian kalkhawmte hmaah Mizoram Sorkar chuan kawlphetha tharchhuah chu an ngaih pawimawh ber anih thu sawiin, Mizoram chu kawlphetha 3500 MW chuang tharchhuak thei a nih laiin tun dinhmunah 50 MW pawh a la thar loh thu a sawi a. A chhan bulpui ber chu sorkar laipui in a sum leh paiah a puih that tawkloh avang a nih thu sawiin, central sorkar chu theihtawp chhuahpui turin a ngen a ni.
Power Minister chuan India ram State dang zawng zawng deuh thaw in anmahni pualin tuikhuahlian nei tawh in, Mizoram in tuikhuah lian a neih ve chhun Tuirial Hydel Project chu Central PSU NEEPCO ta a nih thu leh state sorkar in ram zau tak pe in compensation atan cheng vaibelchhe za tam tak a sen thu a sawi a. Chuti chung chuan man to em em in power lei a nih thin thu te, hetiang ang project chu Mizoram sorkar chuan din a remtih tawh loh thu leh tuna 3500 MW thar theihna a neihte pawh Mizoramin hlawkna tam zawk a neih ve na tur anih phawt chuan company rawn luh pawh tha a tih thu te a sawi. Pu Rodingliana chuan NEEPCO in eng chhit loh man, Shortfall Energy Bill Rs.102 Cr. lai mai a thin tawh thu kalkhawmte hmaah sawiin, hetiang harsatna hi a thlen tawh loh nan Ministry of Power leh CEA lam thuneitute chu hma la turin a ngen nghal a ni.
Mizoram Power Minister hian North East Power Ministers Meeting a a lo thlen tawh MNRE scheme ‘Development of Small Hydel Project’, kum 2014 a tihtawp tak chu NE State ten an lo hlawkpui tawh thu sawiin, North East Power Minister zawng zawng ten he Policy hi tihnun leh an duh thu leh an nghakhlelh thu sawiin, Power Minister hmasa zawk Pu RK Singh an a hnena Cabinet approval chauh nghah anih tawh thu a sawi chu chak zawka bawhzui sak turin a ngen nghal bawk a ni.
Mizoram sorkar in Central lama Project a theh thlakte a tlangpui in state dang aiin Project cost a sang bik ni a chhanna an dawn thin chu sawifiah bawkin, Mizoram chu state dang te nena khaikhin theih a ni lova, India ram hmarchhak kilkhawr, tlangram chhengchhe taka awm anih avangin, kawng a kualin bungraw chawkluh man a to bik em em a, tin, kumkhatah furpui ruahtui tlak tam lai ni 100 chuang anih avangin company tam zawk an rawn kal tha duhlo a, kan thenawm lawk Guwahati ah cement bag 1 Rs 300/400 a lei theih laiin Mizoramah chuan Rs. 500/600 chuang a lei a ngai a, hengte hian project cost a ti to a, hei vang hian ngaihnathiamna sang tak nei turin Central lam thuneitute a ngen nghal bawk a ni. Chutih rual chuanin Mizoramin ruahtui a dawn tam hi power lam atan chuan malsawmna a nih thung avangin Hydel project tam zawk siam turin Mizoram sorkar a inbuatsaih a, theihtawp chhuaha Central lama thuneitute puihna a ngen nghal bawk a ni.
He Power Minister Conference ah hian thu pawimawh tak tak sawiho zingah Mizoramah pawh kalpui tura hmalak mek heng Pump Storage Project Battery Energy Storage System (BESS) chungchangte, Electric Vehicle Charging Station buatsaih chungchangte, PM Surya Ghar Rooftop Solar hmalakna kal mekte, Smart Metering Project bakah Solar Park tam zawk din chungchangte sawiho a ni.
