No.5881/2020-2021

Dated Serchhip, the 8th October, 2020: Vawiin hian Serchhip District Level Standing Committee on Electoral Roll te chu an Chairman Pu Kumar Abhishek, IAS, District Election Officer ni bawk hovin an thukhawm a. New Serchhip huam chinah Polling Station thar pahnih dah belh chungchang an rel.

Chairman Pu Kumar Abhishek chuan, Election Commission of India chuan mipuiten kokim taka vote kan thlak theih nan Polling Station pakhat chhungah voters awm tam lutuk lo turte, mitin tan Polling Station a hlat loh theih nan te ruahmanna a siam a. Chu ruahmanna bawhzui chuan Serchhip District chhungah pawh Polling Station siam belh ngai kan neih te, kumtin a tahtawla siamrem chhoh thaa hriat a nih thu sawiin, tuna New Serchhip Area a Polling Station siam belh pawh hi chumi hmalakna pakhat a nih thu a sawi a ni.

Pu Vanlalhmachhuana, Election Officer chuan hmalak dan kimchang report a pe a, Serchhip District ah hian Polling Station thendarh ngai paruk vel a awm mek thu a sawi a. Election Commission of India chuan Polling Station pakhatah Voters 1500 aia tam awm lo thei se a duh a, tuna New Serchhip thendarh tura rawt chhungah hian voters 1200 vel an awm a, inthlanpui a lo thlen leh meuh chuan an kumtin pun chhoh dan atang chhutin 1500 an pel thei dawn a ni, tiin New Serchhip chungchang a sawifiah a. Kumleh lamah hetiang dinhmun a ding veng leh khaw dangte pawh siam chhoh zel a tul tur thu a tarlang a ni.

Meeting chuan, 26/23 New Serchhip I, Govt. M/S Polling Station chu 26/23 New Serchhip I leh 26/24 New Serchhip II ah thendarh ni se tiin a rel a, New Serchhip I P/S chuan Agri & Seri Complex, Kikawn leh Sihphir vengte huamin voters 480 vel an awm ang a, Polling Station atan North Branch YMA Hall an hmang ang. New Serchhip II P/S chuan Bazar, Luiralmawi leh Khawtetlang a huam anga, voters 550 vel awmin Govt. M/S chu Polling Station ah a ring zui ang.

26/25 New Serchhip III atangin 26/26 New Serchhip IV leh 26/27 New Serchhip V ah then chhuah ni se tiin a rel bawk a. 26/26 New Serchhip IV chuan Venglai chin zawng a huam anga voters 542 an awm anga, Polling Station ah Brilliant HSS an hmang ang. 26/27 New Serchhip V chuan Bilzel, Police veng, Tlangnuam veng leh IOC chin a huam anga, voters 663 awmin Polling station ah PCR H/S an hmang ang, tiin a rel a. Tichuan, khawih ve loh New Serchhip II Polling Station huam hote kha 26/25 New Serchhip III an ni ve tawh thung ang.

Heng rawtna te hi Mizoram Chief Electoral Officer lo pawm tura thlen tur a la ni a, chuta tangin Election Commission of India ah la kal zel tur a ni.