Vawiin chawhma dar 10 AM khan Lunglei Town Sanitation Task Force buatsaihin Mizofed Kawt, Venglai, Lunglei ah Nghasih lui fintu Sipai lui thenfai hnatlang Flag Off na Pu Lawmawma Tochhawng, Vice Chairman, High Powered Committee, Lunglei chuan a nei.

Flag Off na inkhawm hi Pu Andrew Lalhruaia, DUDO, UD&PA Department in kaihruaiin Pu Lawmawma Tochhawng chuan Lunglei khawpui faina leh thianghlimna ah hma kan sawn tawh hle a, amaherawhchu bal leh bawlhlawh laka chhanchhuah leh dona thlak ngai ta hi a lungchhiatthlak ati.  Kan tui tlanna ber Tlawng lui fintu Nghasih lui chhanchhuah ngaia awm hi a vanduaithlak  tiin thenfai ngaia siamtu chu Lunglei khawchhunga cheng te hi kan ni ati. Hemi anih avang hian bawlhlawh paih kawngah fimkhur theuh turin Lunglei mipuite a chah in kan lui te hi  thalai ten an enkawl loh chuan tui tlan tur tha kan nei lo mai a hlau thu a sawi bawk. Faina leh thianghlimna kawngah Lunglei District in National Award dawn avangin lawmthu a sawia, hun lo la kal zel turah pawh lawmman dawng zel tura tan lak a ngaih thu a sawi ani .

Pi. K. Lalrinzuali, Deputy Commissioner leh Chair Person, Lunglei Town Sanitation Task Force pawh in thusawiin India ram pum ah faina beipui kalpui mek a ni a, Faina leh thianghlimna ah hian mipui leh thalaite hi an pawimawh  hle ani ati. Khawpui hi thingtlang ai a fai tur zawk kan ni a, kan fai chuan kan hrisel ang a, kan damrei bawk ang tiin pawl leh dept. hrang hrang hmalakna in faina kawngah National Award dawng thei a Lunglei District awm hi a lawmpui thu a sawi bawk.

Nghasih lui fintu sipai lui thenfain hnatlang ah hian UD&PA Dept. bakah Lunglei Govt. College,Govt. J. Buana College, Mizoram Polytechnic leh Hatim zirlai thahnem tak an thawkchhuak ani.