877/2024-2025

20th June, 2024 : Vawiin khan State Council of Education Research and Training (SCERT) buatsaihin Jubilee Hall, Ngopa-ah Ngopa khawchhunga high school zirlaite tan ‘Career Awareness Campaign’ neih a ni.

Programme hawnna hun hi Pi Florence Lalrinpuii, Deputy Director, SCERT chuan a kaihruai a. Dr. Lalhmangaihzuali, SDEO, Ngopa, Pu Lalengkima, VC Member, Ngopa leh Pi Caroline Zoramthangi, Joint Director, SCERT ten thu tawi sawina hun an nei a ni.

Career Awareness Campaign-ah hian National Education Policy 2020 in a sawi angin, zirlaiten eizawnna tur leh zirna an kalpui zel dan turah ruahmanna siam dan te, mizia leh tui zawng mila subject stream thlan thiam te, mahni kea ding thei tura kawng zawh tur thlan nana ruahmanna siam dan te leh hlawhtlinna chang tura pawimawh hrang hrang te sawi a ni a. Vocational education leh skill training chungchangte zirlaite hrilhhriat an ni bawk. Resouce person te chu SCERT atangin Pi Caroline Zoramthangi, Joint Director, Pu F. Lalliansanga, Deputy Director leh Pi Lalrindiki, Lecturer te an ni.

He hun ah hian Ngopa khawchhunga high school pathum – Govt. Ngopa H/S, K. Lalthlamuana Memorial H/S leh Eklavya Model Residential School-a pawl 9 leh 10 zirlai 202 leh zirtirtuten an chhim a, zirlai naupang te hnenah ‘Career Information Booklet’ sem a ni bawk.