Vawiin khan tunlaia khawvelin a buaipui natna hrileng mek, COVID-19 chungchangah Ngopa Civil SDO huamchhunga Sorkar Department hrang hrang, Village Council leh NGO te’n sorkar thupek țha taka zawm a nih theihnana hmalak ho dan tur chungchang relin  Pu Vanlalțanpuia, SDO Civil, Ngopa hovin an țhukhawm. 

Thukhawm chuan Ngopa leh a chhehvel khuate Covid-19 laka a him theihna turin hetiang hian hmalak dan tur an rel:  

1. Khawkawn khaw paltlanga Manipur leh Mizoram inkalpawhna awm mek (NH 102 B) hi Sorkarin Manipur leh Mizoram inkalpawhna tura a ruahman bik ni mah se, tun dinhmunah chuan mipui nawlpui mamawh, ei leh bar phurhna atana hman a nih lem loh avang leh passenger phur Lirthei chauhin helai kawng hi   an hman   avangin,  mipuite COVID-19 laka an him zawkna tur a nih beiseiin April ni 20 thleng tal  nh 102 B chu ramriah khar a, eng Lirthei  mah tlan tlang phal lo tura sorkar ngen ni se tih a ni. 

2. Mizoram Sorkar thuchhuak angin, Ngopa SDO Civil huam chhunga khaw tinah a rang thei ang berin Village Task Force din ni se, he task force an dinna lehkha hi Saitual DC, Ngopa SDO Civil leh Champhai DLAO ah  ni 23.3.2020 aia tlai loah a copy pek ni se tih a ni. 

3. COVID -19 chungchang hi uar lehzual zawka inzirtir turte, hmun dang atanga rawn haw te ni 14 chhung pawn chhuak thei loa khung hrang tura hmalakna kalpui dan turte, mipuite chu țul bik thil tak takah lo chuan hmundanga zin chhuak lo tur leh țhenawm khawveng te pawh intlawh tawn uar lo deuh tur te, țul bik thila an zinchhuak a nih pawhin an zinkawngah Hotela chawlh ngai lo tura mahnia ei leh in inpai țhin tur te, bial chhunga Bank hrang hrang dawr țhintute him zawkna turin SDO Civil in hma la se tih leh, sorkar Damdawi in hrang hranga damlo awm mekte pawh anmahni (damlo) awmpuitu leh chaw petute tih chauh lo chu tumah tlawhtu awm lo tura hmalak ni se tih an rel bawk a ni. 

He meeting-ah hian  Civil SDO Ngopa huamchhunga khawtin  VCP leh YMA President te bakah official lam atangin BDO, SDO PWD, SDO PHE, SDO, P&E, BRC Samagra Shiksa te leh  Mimbung, NE Khawdungsei leh Ngopa damdawi in aiawh  te an tel bawk a ni.