375/2023-2024

Champhai, the 9th May, 2023: Tunhnaia Champhai District chhung Ngur khuaa Vawk pul hri leng mek, African Swine Fever (ASF) darh zel tur ven kawnga hmalak zel dan tur chungchang ngaihtuahin vawiin khan District A.H & Vety. Officer (DAH&VO) Dr. B.Lallawmsanga hovin Ngur Model Village Office-ah inrawnkhawmna neih a ni.

Inrawnkhawmna hun hi Ngur VCP Pu H. Tawnga'n a kaihruai a, District A.H & Vety. Officer Dr. B.Lallawmsanga'n vawk hrileng chungchanga hriattur pawimawhte a sawifiah a. He hunah hian Ngur VC leh NGO hruaitute an tel a ni.

Sawihona zau tak neih a nih hnu leh ngun taka ngaihtuahho a nih hnuah Department leh khawtlang aiawh kalkhawmte chuan Ngur khuaa vawk damlo mekte'n vawk dangte hri an kai darh zel loh nan suat veka mumal taka phumbo vek ni se an ti a; a ranglama hma la tur leh a tul angte buaipui nghal thuai turin VC leh A.H & Vety. Department-te chu ruat an ni.

Vawiin thleng khan Ngur khuaa vawk pul hri African Swine Fever (ASF) leng mek avanga vawk thi zat hi 67 a tling tawh a, A.H & Vety. Department hmalaknain vawk damlo 7 suat a ni tawh bawk. Tun dinhmunah hian vawk damlo engemawzat an la awm mek bawk a ni.

District A.H. & Vety. Officer Dr.B.Lallawmsanga chuan 'The Prevention and Control of Infectious & Contagious Disease in Animal Act 2009, Section 20 Sub-Section-I in thuneihna a pek angin Ngur khua chu May ni 4, 2023 atanga thuleh awm hma vawk hrilenna hmun 'Infected Area' ah a lo puang tawh a. Ngur khua atangin vawk lakchhuah emaw, lakluh emaw phal a ni lova, vawk thi reng reng paih mai lovin chinai (Lime) nen thuk taka phum tur a ni a, Ngur khuaah vawk talh leh vawk sa zawrh khap tlat a ni bawk.

Ngur khuaa vawk hrileng avang hian Champhai District Magistrate Pu James Lalrinchhana chuan Sec. 144 CrPC, 1973 (Act II of 1973) in thuneihna a pek angin Ngur khua, Champhai District atanga vawk/vawk sa leh vawk sa atanga siam reng reng hralh chhuah/thawn chhuah/lak luh khap tlat a nih thu May ni 1, 2023 khan a lo puang tawh bawk. He thupek hian thla hnih chhung a huam dawn a, dan bawhchhiate chungah hremna lekkawh zel a ni ang.