Vawiin chawhma khan NLUP conference Hall ah Pu R.Lalzirliana, Minister, Home, Agriculture, etc., chuan ni 2 awh tur hmarchhak state te puala buatsaih Regional conference on Integrated Land and Water Resource Management in Hilly Areas chu a hawng . He conference hian ni 2 a awh ang a, hawnna programme hman zawh a nih hian conference chhan ber Integrated land and water resources management in hilly area tih thupui a hmang in tlangram tuihna leh leilung humhalh dan kawng dap in mithiam ten technical session vawi 5 an nei ang a, he technical session hi naktuk ah zawh a ni ang. He programme ah hian Horticulture MinisterPu PC Lalthanliana, AH&Vety Minister Pu C.Ngunlianchunga, NIB Chairman Pu J.H. Rothuama, State Planning Board Vice Chairman Pu H.Liansailova, NIB Vice Chairman/CEO Pu P.L. Thanga, Manipur State Chief Secretary Pu P.C.Lawmkunga, NERIWALM Convener prof. S.C.Patra,Pu M.Satyanarayana, Adviser, NWM, Principal Secretary, Commissioner/Secretary, Secretary, Head Of Department leh sawrkar mipawimawh te bakah state chhung leh pawn atanga lo kal mipawimawhte an tel a ni.

Vawiin a tan naktuka tiak tur Regional Conference on Integrated land and wtaer resource management in hilly areas hi NLUP Implementing Board (NIB) leh North East RegionIntegrated Water and Land Management(NERIWALM) te thawhhona a buatsaih a ni a. Conference neihchhung hian panel of experts a thu mithiam sawmbik ten session`4 chhungin tha zawk leh sawt zawka tlangram a tuihna te leh leilung humhalh dantur sawihona leh infinchhuahna hun an hmang dawn ani.

Tuihna leh ram leilung humhalh leh enkawldan zirhona regional conference programme hawngtu Home Minister Pu R.Lalzirliana chuan Ministry of Water Resources lehNERIWALM, Tezpur chu NLUP behchhana tuihna leh leilung hauhsakna enkawl dan zirhona NIB nen an buatsaih thei chu a lawm a. Minister chuan Mizoram hian ruahtui hi kumkhat chhungin 2200cm vel lai chawhrualin dawng thin mahse, ram hmelhmang leh pianphungin a zirmiau si loh avangin 90% vel lai chambang lovin a luangral leh mai thin a. Tui tam tak kan leilung hian a khawl thei lo mai nilovin, chhiatna thlentu- leimin leh leitha luan ral tu mai a lo ni zawk hial a. He kan ruahtui tam luangliam thin hi malsawmna ah chantir dan kawng kan dap vat a tul a ni a ti a. Mizoram flagship programme NLUP kum 5 lai lo kalpui tawh hi tha taka kan kal pui zel chuan henga kan harsatna te pawh hi a zia awm zel dawn a. A chhan chuNLUP scheme ah hian hmasawnna ngelnghet, ramngaw, tuihna, ramsa leh leilung humhalhna chen in a awm vek a ni a ti. Kan Flagship programme hi UNO hnuai pawllian pui pui FAO, UNIDO,ILO,UNDP leh IFAD te pawn a thatzia an rawn hmu a an zirchian hnuah 'joint UN Innitiatives for Mizoram' tih project a siam in hma minlak pui mek a ni a ti a. NLUP hnuaiah ei leh bar a intodelhna, eizawnna kawnga ngelnghehna, kan awmna leh a chhehvel nungcha leh ramngaw humhalh leh Energy sector a intodelhna hi tih hlawhtlin a ni dawn a ni a ti a ni.

Regional conference hawnna inkhawm ah hian NIB Chairman Pu J.H.Rothuama, NIB Vice chairman/CEO Pu P.L. Thanga, Manipur Chief Secretary Pu P.C.Lawmkunga lehProf. S.C.Patra te pawn thu sawina hun an hmang a. Manipur Chief Secretary Pu P.C. Lawmkunga pawhin NLUP ang deuhva hmasawnna programme liantham tak Manipur State in kalpui a tum thu a sawi a. Nakin lawkah Mizoram in rem a tih chuan Manipur atangin mithiam rual NLUP zir tur in rawn kal tir an nih tur thu a sawi a ni.