No.7814/2020-2021 

Kolasib Dated the 17th March 2021:  Vawiin chawhma khan Dr.H.Lalthlangliana chuan Mizoram Journalist Association, Kolasib district-te kawmin Kolasib district a Covid-19 dona kawng a hmalakna kal mek leh Kolasib district dinhmunte a sawipui a. He hunah hian Pu Lallawmawma, Addl. DC, Pu Vanlalchhuanawma Chawngthu, SDO(S) leh Pu Hmingthanzuala, DIPRO te an tel bawk a ni.

Dr.H.Lalthlangliana chuan hripui dona kawngah nunphung pangai zawh chhoh mek a nih rualin ramri luhka, Vairengte leh Bairabiahte chuan a tul angin zin mite endikna kalpui chhunzawm zel a nih thu a sawi a, sawrkar inkaihhruaina dinglaite ngai pawimawh a fimkhur chhunzawm zel a tul thu a sawi bawk a ni. “Kolasib khaw chhungah January ni 20 khan Covid19 kai thar hmuh hnuhnun ber a ni a, Vairengteah January ni 30 khan niin Bairabiah February ni 20 khan a ni bawk ,” a ti a,” Kolasib district pum ang pawhin ni 20 chuang Covid19 kai thar hmuh a ni tawh lo a ni,” a ti. Hetiang dinhmun a Kolasib district a awm theih nachhan chu mipui thuawihna leh dawhtheihna vang a nih piah lamah mipui leh sawrkar inkarah thawhhona tha tak a awm thin vang a nih thu DC, Kolasib chuan a sawi bawk a ni.

Kolasib district-a Covid19 dona kaihhnawih a hmalaknate chu ziaka dahthat a nih thu Dr.H.Lalthlangliana chuan sawiin ‘Documentation on Covid19 volume-I’ chu tlangzarh a ni tawh thu leh volume-II pawh buatsaih chhunzawm mek a nih thu a tarlang bawk a ni.