No.1743/2021-2022
Aizawl, 8th August, 2021 : Mizorama kal tur lirthei, eirawngbawlna gas phur, tuialthei phur leh nitin mamawh phur lirthei/motor 8, Mizoram House, Silchar-a tangkhang mekte chuan SP, Cachar District in DRC, Mizoram House, Silchar hnenah Driver leh an motor te venhim a tiam avangin; Nimin August ni 7, 2021 (Sat) chawhnu dar 3:45 bawr vel khan Assam Police, SI pakhat leh Assam Armed Police section khat escort-na hnuaiah Mizoram an rawn pan a.
Lailapur an thlen hian tu tih hriat loh misual rual ten Mizoram lam pan tur lirthei te hi nasa takin an lo bei a. Lirthei leh a khalhtu te chuan an sahimna zawngin Mizoram House lam an pan leh a ni.
Security lapse avanga Lailapura a Mizoram lirthei beih tawk te hi Mizoram sawrkar chuan a dem takzet a. Nizan la la khan Assam Sawrkar leh MHA-ah lehkha thawnin; kan lungawi lohzia leh security arrangement kan demzia thlen nghal a ni a, nikum October ni 31-ah pawh hetiang security lapse hi alo thlen tawh thu pawh sawilangin hetiang ang boruak a thleng leh hi na takin a dem a, security lapse hi thleng nawn leh tawh lo turin Mizoram sawrkar chuan Assam sawrkar ah a thlen bawk.
He thil thleng avanga Mizoram sawrkar lungawihlohna chu hriain Assam sawrkar chuan Mizoram lam pan tur lirthei Lailapur-a tangkhangte chu nizan August ni 7 la la khan an rawn chhuah leh a, Mizoram House pan leh ta lirthei te chu boruak leh driverte dinhmun azirin Mizoram an la rawn pan ve leh dawn a ni.
He thil thleng vanduai thlak tak avanga hliam tuar leh lirthei tihchhiatsak te Mizoram sawrkar chuan a tawrhpui takzet a, hetiang hi thleng toh ngai lo se la kan ti bawk a ni.
