Mizo infiamna hmanga intihsiak, Serchhip Town chhung, Chhiahtlang, New Serchhip leh Serchhipa Branch YMA hrang hrang 16 te telna chu Minister Pu PC Zoram Sangliana chuan khuallian niin nimin tlai dar 3:30 khan a khar.

Khuallian Pu Ramsanga chuan Mizo infiamna chawinung leh tura hetiang intihsiak neih a ni chu lawmawm a ti a. Mizo hnam infiamna te chu humhalh thar zel tura tan la turin kalkhawmte a chah a, Commonwealth Games New Delhi a neiha India team hruaituin incheina atana a lo hman tawh Mizo inthuamna chu Biak In-ah pawh hak tlak a ni tiin, hnam incheina uar thar leh kawngah Mizo thalai ten theih tawp chhuah a ngai a ti bawk. A sawi zelnaah Pu Ramsanga chuan Mizo thalai 17,000 laiin Cherawa world record a siam thei chu malsawmna a ni tiin lawmthu a sawi nawn leh a, 25th October, 2011 atanga tan tur YMA General Conference neihna tur Kolasib bialtu MLA ni bawk Pu PC Zoramsangliana chuan YMA chu Mizo zawng zawng huap a nihna vawng nung zel turin YMA member kalkhawmte a chah bawk.

Mizo infiamna hmanga intihsiakna Serchhip Field no- II a neih, nimina kharna hun hi Art & Culture Director Pu Ngurbiaka’n kaihruaiin, Director chuan he intihsiakna hlawhtling taka buatsaih a ni chu lawmthu a sawi. Intihsiak hi North East Zone Cultural Centre (NEZCC), Art & Culture Deptt leh YMA Sub Hqrs Serchhip te buatsaiha neih niin, mizo infiamna item chi hrang hrang 11, Kalchheta intlansiak, Ketaminu kal, Arpa insual leh Arpa thai, Chawilung, Rawkuailawn, Team-a insuknawr, Kawikah, La Dinlek, Zo sairawkherh perh leh Inhawngbi ah intihsiak hi neih a ni a. A pumpuiah New Serchhip Bazar Branch chu point 39 hmuin an champion a, 2-na Serchhip Darnam Branch chuan point 22 hmuin, 3-na Serchhip Vengchung Branch chuan point 18 an hmu bawk.

Attachment

  • Loading attachment...