4680/2024-2025

Dated Aizawl the 18th March, 2025 : Vawiin chawhma khan Commerce & Industries Department buatsaih State level workshop on North-east Region (NER) Schemes chu I & PR Conference Hall, Lianchhiari Runah neih a ni a. Dr. Lalzirmawia Chhangte, Commissioner & Secretary Commerce & Industries Department  chuan he hun hi a hmanpui a ni.

Workshop hawnnaah hian Dr Lalzarmawia chuan thusawiin, tun hnaiah Department hmalakna avanga MSME pawhin Mizoramah kawng dik a zawh mek thu leh, Mizoram chu India hmarchhak hmasawnna kailawn a nih dante a sawi a. Sawrkar laipui atangin India hmar chhak bikah chauhte kalpui theih chi scheme tam tak a awm tih tarlangin, chung chuan Mizorama industry hmasawnna mai piah lamah, ei leh bara intodelhte a keng tel tih a sawi a. Dr. lalzirmawia chuan scheme eng pawh a hlawhtlinnna tur chuan ruahmanna hmumal tak neih chu a pawimawh hle tih sawiin, Department hmalakna te ngaichang thiam a; sawrkar thawhhopui zel turin kal khawmte chu a chah  a. Awareness tha leh zual a pawimawh thu sawiin, workshop chu tangkai thei ang bera hmang theuh turin lo tel zawng zawngte chu duhsakna a hlan nghal bawk a ni.

Hun hman hi Pu HB Lalremmawia, Promotion Officer, Commerce & Industries Department chuan kaihruaiin, Pi Mariah CT Zuali, Director C&I chuan hun hmandan tur leh NER Schemes kaihhnawiha Mizoram dinhmunte a sawifiah a. Hei hi workshop atana presentation hrang hrangte chuan  a chhunzawm nghal a ni.