Ni thum thanga Serchhip leh Thenzawl tlawha zinchhuak, Chief Minister Pu Lal Thanhawla chu vawiin khan damtakin Aizawl alo thleng leh ta. A zinna ah hian a nupui Pi Lal Riliani, Pu P.C. Lalthanliana, Minister of State for LAD etc, Pu K.Lianzuala, Chairman, KVI leh Pu RL Pianmawia, Govt. Dy Chief Whip ten an tawiawm a ni.

 

 

Serchhip a thlen ni, ni19 August 2009 khan Chief Minister chuan Serchhip DC Complex-ah DLAO Office building thar a hawng a. Tarlan tawh angin, office thar lawmna inkhawm DC Conference Hall-a neihah, Chief Minister chuan a building chu a sak phungah tha tawklo nia hriain, a satu contractor leh a enkawltu supervisorte mawh anih thu sawiin, hetiang khawtlang leh hnam ro hi uluk theihtawpa kan sak a tul a ni a ti. A hmunhma lei anih atanga pawisa kawngbo awm nia a hriatthu sawilangin, hetiang pawisa kawngbo awm thin avang hian kum 10 kalta chhung khan Mizoram hi anih tur ang a ni phaklo a ni a ti a. Tunah hian a chhelai, kihhnawk tam tak an rochunte hi siam tha chung zela kal an nih avangin duh anga an kal chak theih loh thu a sawi a. Hnam inchimral chungchang a sawiah, Pu Hawla chuan chimral hlautute hi mi taima lo vek an ni tiin, chimral kan hlau anih chuan eng hna mah thawk hreh lovin, kan taima tur a ni a ti. Hemi chungchanga pawl hrang hrang te nen an sawiho thu sawiin, vai milian leh hausate zara motorcycle leh mobile kan neih theih chhung chu chimral theih dinhmunah kan ding a ni tih a hrilh thu a sawi a. Chuvangin kan zinga kan khua leh tui nilo, mi nuai hnih dawn vel awm ve rengte hian hnathawh hreh neilovin inhlawhna an hmu reng a, hei hi kan hupbeha an thawh ang kan thawh peih angai a ni a ti. Inhlawhna  tur an hmuh loh na na chuan Mizorama an awm peih reng a rinawmlo a ni a ti. Mizoramin hmalam a pan zel theih nan tunah hian Sairang thleng rel kawng siam anih dawn thu sawi nawnin, nakinah Multi Modal Transport Project bul tan mek chu kan chhawr theih hunah Lawngtlai thleng rel kawng siam ala tul ang a ti bawk.

NLUP chungchangah an sorkar hmasak hunlai anga kalpui anih loh tur thu sawiin, a dawngtu ten an hlawhtlinpui ngei theih nan hmalak a ni ang a ti a. Hemi kawnga thil tul, a dawng turte rilru kaihhruaina, motivation campaign pawh kohhran ten min neih sak dawn a ni a ti.

Chief Minister chuan Serchhipa sorkar hnathawk hotute kawmin, sorkar hnathawhdan phung ( Work Culture) diktaka kengkawh tura chahin, inthununna leh work ethics ngaipawimawh reng turin a ngen a. Sorkar hnathawk hausa tawh, luhlulte anga awm lo turin a chah bawk a ni. Pu Lal Thanhawla chuan Fitman Report chungchang sawilangin, committee membera a neitu, state sorkar hnathawk telh an nilo chu an tihfuh loh pakhat a ni tiin, tunah hian cabinet ala thlen loh thu sawiin, sorkarin thlirhona a neih zawhah, Budget Mid Term Appraisal hnulamah a hman dan tur ruahman a ni ang a ti.

Khualzahawm Pu P.C.Lalthanliana pawhin thu sawiin, DLAO Office leh a building lo awm theih na chhan chu district petute vang a ni a ti bawk.

Office thar lawmna inkhawm hi DC Pu H. Darzika’n a kaihruai a ni.

Serchhipa a cham chhung hian 4 Assam Rifles hotu Col Roveen an chawchhun Chief Minister te nupa pual hian a buatsaih sak a, amah zuitute pawhin chawchhun hi an chhim ve nghe nghe a ni.

Chief Minister hi Thenzawlah PWD Staff Lodge ah sorkar hnathawkte leh mipui ten lo hmuakin khawtlang mamawh nia an hriatte an lo thlen a. Chief Minister chuan helai tlangdung a khaw pawimawh ber an nih thu sawiin, kawngpui hi an sum hnar tur anih thu a sawi a. Chuvangin tun hun mai hi ngaituah lovin, nakin a an tu leh fa, tuchhuan lo la kal zel tur thlenga chenna nuam anih theih nan ngaihtuahna thar hmang turin a chah a ni.