Vairengte leh Thingdawl-a NLUP Bawng Quarantine-a dah mekte chu vawiin khan NLUP Implementing Board (NIB) hotuten a hmunah kalin an endik a. Heta bawng dah khawm tehi AH & Vety Doctor te chuan uluk taka enkawlin tun dinhmunah an tha hle tih an finfiah a ni.

Vawiina Vairengte leh Thingdawl tlawhtute hi Pu R. Selthuama, Chairman, NIB, Col. ZS.Zuala, District Monitoring chairman, Pu J. Hmingthanmawia, Addl. DC, Aizawl, Pu Zorammuana, Secretary, NIB leh Pu David L.Thangliana, CMO, NIB/IPR te an ni a. Heng khaw pahniha NLUP Bawng dah te chu mi thenkhatin sem tlak loh leh chhe lutuk anga an thantir chu thudik a nihloh zia leh tun dinhmunah mithiamten uluk taka an enkawl a nih avanga sem chhuah mai theih an nih zia a takin an hmu tih an sawi a ni. Vawiin hian heng sawrkar hotute hian Bawng vulhtu mi 4 an hruai bawk a. Heng Bawng vulhtute pawh hian Bawngte chu tha an tih thu an sawi a ni.

Vairengte leh Thingdawl-ah hian Bawng 123 an awm mek a. Vairengte-ah hian Bawng 99 an awm a a ni. Thingdawl-a Bawng engemaw zat chu kal kawnga an in sawhna duhthusamin anla thalo deuh tih loh chu a dang chu an hrisel hle tih mithiamten NLUP hotute hi an hrilh bawk a ni.

NIB hotute hian Bawng dawng tawh vulh mekte pawh an tlawh nghal a, heng mite hian an bawng vulh chu tha an tiin sawrkar chunga an lawmzia an sawi a ni.