Planning Commission thlaktu sorkar laipuia National Institution for Transforming India (NITI) Aayog Adviser (SP/WCD) BK Pandey leh official dangte’n zan khat riakin Mizoram an rawn tlawh.
Pu BK Pandey rual hian Govt. of West Bengal a P&RD Commissioner Pu Dibyendru Sarkar leh Govt.of Sikkim a RM&D Additional Secretary Pu Anil Raj Rai te an lokal a. Mizoram Chief Minister Pu Lal Thanhawla’n Mizorama faina beihpui thlakna kawnga sorkar leh khawtlang thawhhona thatzia a sawi chu ram chhung hmun danga chin ve tlak a ni em tih zirchiang turin an lokal a ni. An cham chhung hian Mizoram sorkara UD&PA leh PHE Department official-te kaihhruaiin ITI Veng, Aizawl Municipal Council, Baktawng leh Seling an tlawh a ni.
Nimin chawhnu khan Aizawl lo thlengin PHE Minister Pu Zodintluanga chu a pisaah an hmu a. Aizawl khawpui chep tak karah khawpui fai taka an vawng thei chu lawmawm an tih thu an sawi rualin bawlhhlawh hman nawn (recycle) theih chi leh nakin zela leithaa la chang mai thei tur biodegradable waste thliar hran a nilo erawh pawi an tih thu an sawi a. Minister chuan hemi kawngah hma chak taka an lak mek thu leh Solid Waste Management atan project pawh duan niin sorkar laipuiah DPR thehthlak a nih tawh thu a lo hrilh a ni.
An team hian Aizawla feng vai ber nihna lo hauh fo tawh ITI veng tlawhin YMA leh khawtlang hruaitute an kawm a. Tlawmngai pawl YMA leh a dangte kaltlanga mipui mimirin lungrual taka an veng leh khawtlang a lo fai zawkna tura an thawhhona chu entawntlak an tih thu leh hmun dangah pawh he thil hi kalpuia hman ve tlak nia an ngaih thu an sawi.
Hemi ni vek hian Aizawl Municipal Council tlawhin an Chairman Pu CT Zakhuma leh CEO Pi M Zohmingthangi leh Executive Councillor dangte’n an lo dawng sawng a. AMC Conference Hall-ah inkawmhona hun hmangin Aizawl faina tura hma an lak dan an hrilhfiah a. Central sorkarin Swachh Bharat Abhiyan a kalpui hma daih kum tam tak chhung Mizoramah faina hapta hman a lo nih tawh dan te an sawi a ni.
Vawiin khan Tuiriala bawlhhlawh paihna hmun UD&PA dumping ground, Baktawng Tlangnuam leh Seling khuate an tlawh a. Khawtlangin bawlhhlawh an paih dan leh sawngbawl dante an enfiah hnuah Mizoram an chhuahsan a ni.
