303/2025-2026

Aizawl dated 24th April 2025: Vawiin chawhma khan Niti Aayog leh Planning & Programme Implementation Department tawngkawp buatsaih, ‘Capacity Building Workshop for MEL Competencies’ chu Pu TBC Lalvenchhunga, Adviser to Chief Minister chuan Planning Department Conference Hall-ah a hawng a. Pu Lalmawlsawma Pachuau, Secretary, Planning & Programme Implementation Department chuan hun kaihruaiin Pu Dhrijesh Kumar Tiwari, Joint Secretary, Development, Monitoring and Evaluation Office (DMEO), Niti Aayog chuan kalkhawmte lawmna thu a sawi a ni.

Adviser to Chief Minister Pu TBC Lalvenchhunga chuan India ram pum a hmasawnna inkhuangrual thlen tur a mawhphurhna pawimawh tak neitu, Niti Aayog-a mithiamten Mizoram Sawrkar hnuai a thawktute hnen ah zirtirna an pe thei tur chu lawmawm a tih thu a sawi a. Hmasawnna tak thlentu ni tur chuan kan tun dinhmun zir chiang a, chumi mil a ruahmanna kalpui a tul thu sawiin chumi tur chuan Data rintlak buatsaih a pawimawh thu a sawi a. Hmasawnna tluantling thlen tur a buaina lian tak chu Data-a thil tarlan dan leh a tak dinhmun inang lo thin hi a nih thu Pu TBC Lalvenchhunga chuan a sawi a. Chutiang harstana a awm loh nan Department hrang hranga thawktu kalkhawmte chu, Niti Aayog leh Planning & Programme Implementation Department buatsaih workshop chu tangkai tak a hmang turin duhsakna a hlan a ni. 

Pu Dhrijesh Kumar Tiwari, Joint Secretary, DMEO, Niti Aayog chuan kalkhawmte lawmna thu sawiin India zalenna kum 100-na a India ram pumin hmasawnna rahbi thar a thlen theihna tur, ‘Vikshit Bharat 2047’ tihpuitlinna kawnga thawktu pawimawh tak nih tum theuh turin kalkhawmte a sawm a. An department thawhna a hmasawnna hna an thawh thinte hlawhtlinna chu mipui nawlpui khawsak dinhmun a lang tur a nih thu a sawi.

‘Capacity Building Workshop for MEL Competencies’ ah hian Rural Develoment Department, Higher & Technical Education Department, PWD, PHE, Environment, Forest & Climate Change, Agriculture, Horticulture, Irrigation & Water Resources, Social Welfare, Health & Family Welfare, Geology & Mining, Economics & Statistics, SIRD & PR, Mizoram State Sports Council leh Planning & Programme Implementation Department-a thawktute an tel a ni.