Nizan khan Mizoram Youth Commission buatsaihin  Khuangchera Project- Huaisen inzirtir hawnna programme chu HYVE Aizawl City Hall ah neih a ni a. Pu Lalruatkima, Information & Public Relations Minister chu khuallian a ni.

Information Minister Pu Lalruatkima chuan MYC moral reforms hmalakna peng pakhat Khuangchera Project- Huaisen inzirtir hawn a ni ta chu lawmawm a ti a, rah tha a chhuah ngei a beisei thu a sawi a. MYC chu thalaite hmathlir tipuitlingtu, lei rem an rah nana kawng tinrenga hma la thin tu an ni a, an hlutna mipuiin kan hriat a pawimawh, a ti.

Mizote ngaihven, kan mittui titla tu, hnam inpumkhatna kawnga tanrualna min pe tu, ramri buai chungchangah harsatna kan tawk a, kan hnam pasaltha ramri khaw hrang hranga awm te, mi tlawmngai leh huaisen te MYC-in chawimawina no pui a dawm tir chu an phu hle a ni, tih Information Minister chuan a sawi a. Hetiang hun buatsaih nachang hria MYC a fak a. COVID 19 hrileng mekah pawh ramria cheng mi tlawmngai tam tak dai theua an hmalakna a ropui a tih thu a sawi bawk. Pu Lalruatkima chuan hetiang hun harsa a lo thlen hian Zohnahthlak tlang hrang hranga cheng te nena kan inunauna a lo parchhuak a, ei leh bar kan nghei hlau em em tu Manipur, Tripura, Bangladesh leh Myanmar-a cheng kan unaute kan chawimawi che u a, kan theihnghilh ngai lo vang, a ti. 

MYC Chairman Dr Vanlaltanpuia chuan Mizoram Youth Commmission-in ram leh khawtlangin rilru kan puthmang a tha zawnga kaihhruai an tum thu sawiin chuta hmalakna peng pakhat atan “Khuangchera Project:Huaisen Inzirtir” chu kalpui an nih thu a sawi a. Pasaltha hming hrang hrang chawiin project hrang hrang -Taitesena, Khuangchera, Vanapa, Chawngbawla leh a dangte kalpui an tum thu a sawi. MYC Chairman chuan Mizote rilrua bet tlat huaisenna chu hnamin a ngai hlua, thalaite zingah huaisen inzitir thar leh a tul nia an hriatthu sawiin Khuangchera Project:Huaisen Inzirtir hi a hawng a ni.  

Serlui bialtu MLA Pu Lalrinsanga Ralte chuan tun hnaia ramri buai chungchangah ramria cheng mipuite an huaisen a, an fakawm tak zet a ti a. Chief Minister hmalakna a fakawm a, ram hruaitu lu ber a huaisen chuan official te leh mipuite an dawih thei lo tiin sawrkar tlawmngai pawl leh mipui te zai khata luangin tum thuhmun neia an tanrualna chuan rah tha a chhuah nia a hriat thu a sawi a ni.

He programme-ah hian Chairman, Joint Village Council, Vairengte; Phainuam VCP; Thinghlun VCP; Saihapui VCP; Pu Laltinkaia, Vairengte; Phainuam Nuho (MHIP) ; Saihapui V Nuho leh Tv. Malsawmkima, Vairengte te hnenah tawlhloh puan, thuziak leh cheng sing khat theuh an hlan a. Central YMA, MZP leh MSU President ten thu sawina hun an hmang bawk.