DoNER Ministry atanga Non Lapsable Pool of Resources hnuaia sum hmuh hmanga hna hrang hrang kalpui mek a nih dan thlirin vawiin khan Chief Secretary Pu Van Hela Pachuau, IAS leh State Planning Board Member Secretary Pu PL Thanga IAS (Rtd) hovin Secretariat Conference Hall, New Secretariat Complex ah sorkar mi pawimawh te an thukhawm.
Ministry of DoNER hian 1998-99 kum atang khan Mizoram chhunga project 88 kalpui na tur cheng nuai 69101.99 a lo pawmpui tawh a. Heng zinga project 56 chu zawh fel tawh niin 32 chu kalpui mek a ni a. Heng project kal lai mek atan hian sum sen tur a ruahman chu cheng vaibelchhe 382.60 lai niin DoNER hian cheng nuai 25,197.46 a pe chhuak tawh a ni. Chief Secretary chuan  sum hmuh chhunzawm a nih theihna turin Department kaihhnawih te chu an hmasawn dan report leh sum hman dan UC kimchang thehlut turin a hriattir a ni.

Project 21,  cheng vaibelchhe  277.88 senna tur chu harsatna hrang hrang vangin a hun takah peihfel hman a ni lo a. Heng bakah hian project 51, cheng vaibelchhe 439.87 senna tur DPR thehluh hmabak DoNER Ministry hian a kawl tawh bawk a ni.Vawiin Meeting ah hian Department hrang hrang a hna thawh zawh tawh leh kalpui mek te thlirho in, chak zawk a bawh zui turin hriattir an ni.

2009-10 chhung khan cheng vaibelchhe 31.58 chu project 11 a hman turin DoNER hian a pechhuak  a. Chak zawk a hnathawh a nih theih nan leh harsatna awlsam zawk a chinfel a nih theih nan meeting chuan hnathawh dan kalphung enfel tur Standing Committee din a rel a ni.

He meeting ah hian State Planning Board, PWD, Power & Electricity, Health Deptt., Sports, PHE, Rural Development, Higher&Technical Education, School Education te bakah a kaihhnawih Department dang aiawh te an tel a ni.