Vawiin chawhma dar 10:30 khan Khatla YMA Hall-ah, Industries Department hnuaia NLUP tanpuina 2nd Instalment chhungkaw 311 hnenah a vaiin Rs. 1,49,22,700/- pekchhuah a ni.

Pu R. Selthuama, bialtu MLA leh NLUP Implementing Board Chairman chuan khuallian niin a hmanpui a, inkhawm hi Pu J.Hmingthanmawia, Addl.DC, Aizawl District chuan a kaihruai.

Khuallian Pu Selthuama chuan a bial chhunga NLUP sum hmanga eizawnna bul tan turte hnenah chuan duhthawh taka thu sawiin, “1st Instalment-a tanpuina sum dawngtu, engmah hma la si lo, kan bial chhungah ngei pawh hian in awm tih kan hria, chung mite chu eng party mi nge in nih lam ngaihtuah a ni dawn lo, vawiin hian 2nd Instalment hi in dawng ve dawn lo, in thawh ve hma chu in dawng lovang” tiin a hrilh.

Department thenkhatah contract ten au Rs. 50,000/- vel beiseiin nutling, patling nitin feh chhuak thin hna pek ni si lo tamtak an awm thu leh pek pawhin a thawh nan sum an sen a ngaih laiin, NLUP-ah chuan dil pawh dil lo, sum seng miah lovin bank loan rulh ngai ang pawh ni lo, Rs.1,00,000/- aia tlem lo sorkarin an pek ngawt hi lawmna chang hriat a pawimawh tih, Pu Selthuama chuan a sawi.

Bul tanna tur sum pek an nih tawh avangin a hlawhtlinna chu a dawngtute kutah a innghat tawh a, kristian ram state-in kan tan hmasa ber a, a hlawhchham chuan kan biak Pathian kan ti mualpho ang, tiin rinawmna leh taimakna nen hma la turin kalkhawmte Pu Selthuama chuan a fuih bawk.

Pu John Saikhuma, General Manager, DIC chuan Technical Report pe-in, vawiina sem hi Bungkawn, Bungkawn Vengthar, Khatla, Khatla South, Lawipu, Maubawk, Mission Vengthlang leh Nursery vengte an ni a, tih a sawi a. Carpentry I & II, Agarbati Stick Making Machine, Tailoring, Handloom leh Broom Making te erawh a khawl leh hmanruaa pek tur an nih angin vawiin hian pek an ni lo tih a puang bawk.

Dr Robert Rualthankhuma, Project Co-ordinator, NLUP Implementing Board chuan lawmthu sawiin, NLUP hotupa bial an nih avangin enthlak ngun bik an nih thu leh tan la zual sauh turin a hrilh bawk.