Vawiin khan Chief Minister leh Chairman, NLUP Apex Board ni bawk Pu Lal Thanhawla hovin NLUP Apex Board Meeting vawi 13-na chu NLUP Conference Hall-ah neih a ni. Tun hnai khan NLUP Apex Board ah hian hi member thar (non-official member) 14 ruat belhin duan thar a ni a, he meeting hi member thar ruat belh hnua meeting hmasa ber a ni.

NLUP Apex Board Meeting-ah hian Home Minister leh NLUP Nodal Minister ni bawk Pu R. Lalzirliana, Finance Minister Pu Lalsawta, State Planning Board Vice Chairman Pu H. Liansailova bakah NLUP Line Department enkawltu Minister leh Parliamenatry Secretary-te an tel kim vek a. Anni bakah hian Chief Secretary Pi L.Tochhong, Line Department zawng zawng Secretary leh Director te bakah Aizawl, Lunglei leh Champhai DC leh District dang DC aiawhte an tel kim hle a ni.

Pu Lal Thanhawla chuan NLUP kalpui naah hmasawnna leh hlawhtlinna tam tak hmu in tluang taka kalpui zel a ni a, chutih rualin hma sawnna tur a la awm tih chu hai rual loh a ni, a ti a. GDP sanna hi NLUP vang niin a lang a hei hian Mizoramin NLUP hi kan thatpui chho zel a ni tih a tilang a ni, a ti. NLUP kum 4 chhunga Sawrkarin a kalpui naah kuthnathawktu leh loneitu mi tam takin lei rem an rap tawhin, khaw eng hmuin hlawhtlinna a nei tawh a mahse mi thenkhat pek chhunzawm tlak loh leh hmang diklo an awm thin hi a pawiin a vanduaithlak hle a ni, a ti bawk.

Chief Minister chuan Mizoram hian NLUP-a Line Department tam zawkte chu an phurin hma pawh an la tha a, mahse thenkhat hi chu an phur teh chiam lo niin a lang a. Hun thar inherchhuak ah hian phurna tharin hma lak a ngai a chutah chuan tupawh hi kan accountable a ni tih hriat reng a tul a, a ti. NLUP Apex Board member thar te chu lawmin Chief Minister chuan kum nga lo awm turah NLUP kalpui zelna kawnga neitu chan changa, an finna leh thiamna te hmanga an ngaituahna te senga hun kal tawh kalphunga atang tein hma thar lak dan sawiho leh thawk turin a sawm a ni.

NLUP Apex Board meeting-ah hian Chairman, NLUP Implementing Board Pu J.H.Rothuama chuan non official member thar te inhmel hriattirna hun hmangin Pathian hnenah lawmthu sawina hun leh Committee thar Pathian hnenah inhlanna hun chu Rev. Zosangliana Colney, Director, Synod Multi-purpose Training chuan a hmang.

NLUP chungchanga Brief Report chu Dr. Robert Rualthankhuma Project Coordinator, NLUP Implementing Board atangin ngaihthlak niin NABCONS atangin December 2012 atanga tun thlenga NLUP endikna leh vilna ‘Monitoring and Evaluation’ an neih chungchangah presentation ngaihthlak a ni bawk.

Pu P.L. Thanga, Vice Chairman leh CEO, NLUP Implementing Board chuan NLUP kal zel dan tur ruahmanna tih thupui hmangin kawnga hrang hranga NLUP hlawhtlinna awm tawh leh hma lakna tur la awm te chu a tarlang. Hlawhtlinna thenkhat a tarlan te hi - NLUP avanga RKVY sum cheng vaibelchhe 200 chuang Mizoramin a hmuh tawh te; MIFCO a din tirh atanga kumin a hmasa ber atan hlawkna sum cheng nuai 58 a hmuh te; hmunphiah hralhchhuah kum 2008-09 a cheng nuai 37 atanga kum 2013-14 a cheng vaibelchhe 14.56 ni ta chho ta te; MULCO bawnghnute tharchhuah litre 15,000 atanga litre 20,000 a pung chho te leh Sericulture Department-ina NLUP beneficiaries baka chhungkaw 3000 chuang mamawh phuhru theia an in buatsaih te leh Jhum area za zelah 65 velah a tlakhniam te an ni.

Hemi hnu hian Agenda chhawpchhuah te sawihona hun neih a ni a. NLUP kalpui anih dan thlir letnate, 2014 – 2015 atan NLUP Budget ruahman dan tlangpui te, 3rd leh 4th Phase hnuaia trade thlan dan tur chungchanga ruahman nate, kum nga hnua NLUP kalpui zawm zel dan tur chungchangte, UN Technical Team-ina rawtna an siamte, NABCONS in NLUP vilzuina leh endikna hna an kalpui dante, tharchhuah hralh(marketing) chungchangte, sa sawngbawlna leh hralhchhuahna kawnga MIFCO nen thawhdun dan chungchangte, PPRS in Mizorama vawk a suat nasat avanga vawkvulh lamah hmathar lak dan chungchangte, leh bawnghnute, sangha leh thlai dangte tana cold storage chungchangte chu Agenda thu chhawpchhuah pawimawh te an ni a.

NLUP hi Cabinet Committee on Economic Affairs chuan 15th July, 2010 khan kum nga (5) chhunga kalpui atan pawmin hemi atan hian sum cheng vaibelchhe 2873. 13 a ruahman a. A tan tirh atanga tun thlenga Planning Commission atanga sum hmuh chu cheng vaibelchhe 1208.82 a ni.

NLUP enkawltu berte chu Apex Board leh Implementing Board te an niin NLUP-ah hian Line Department pakua (9) an awm a, chung te chu: Agriculture, Horticulture, Sericulture , Fisheries, Soil & Water Conservation, AH & Vety, Industries, Environment & Forest leh UD & PA (2nd Phase atangin) te an ni.

NLUP hi Phase wise a kalpui niin 1st Phase hi January 14, 2011 khan launch a ni a, hei hi NLUP tanpuina sem tanna ni a ni. Sorkarin he ni hi ‘Kuthnathawktute Ni’ atan a puang nghe nghe. NLUP Phase tinah hian hetiang hian beneficiaries an awm: 1st Phase-a chhungkaw 45139; 2nd Phase-a chhungkaw 45000; 3rd Phase-a chhungkaw 29861 leh 4th Phase-a chhungkaw 15000 a zavaiin chhungkaw 1,35,000.

NLUP Line Department hian NLUP Cell an nei vek a, chutah chuan Department Head hovin Nodal Officer leh staff te’n rim takin NLUP hna an khawih thin. District tina DC Office-ah NLUP Cell din a ni bawk a, chutah chuan DC hovin NLUP Nodal Officer leh staff ten NLUP hi an khawih a, anni hian NLUP-ah dinhmun pawimawh tak an luah a ni.

NLUP hnuaiah hian Commitee peng hrang hrang a awm a, chungte chu: Monitoring Committee; Marketing Committee; District Level NLUP Committee; Village Level NLUP Committee; Consultative Committee leh Input Purchase Board te an ni. Committee peng dang, hmalakna bil bik khawih tur an awm bawk.

NLUP Apex Board meeting hi vawi 12 neih tawh a ni a, tun tum hi NLUP Apex Board meeting vawi 13-na a ni a, Ministry thara a hmasa ber a ni.

NLUP thil tum zinga pawimawh tak pakhat chu Input Supply-a intodelh hi a ni a, Line Department hrang hrang dinhmun tlangpui hetiang hi a ni:

(a) Agriculture Department chu Red Oil Palm-ah Company nen an thawhhona avangin a chi supply-ah an intodelh. Fu-ah an intodelh bawk.

(b) Forest Department pawh Bamboo plantation atan Nursery tha tak an siam a. A chi-ah an intodelh a ni.

(c) Sericulture Department hi NLUP tan tirh hian beneficiaries te mamawh 2% chauh Mulberry Seed an nei thei a, NLUP hmalakna avangin ram pawn atanga lakluh ngai tawh lovin an intodelh thei ta. Global warming avangin Muga bikah Assam an hlawhchham mek a, ram vawt zawk Mizoramah a tha dawn tih hriain Central Silk Board chuan Muga kalpui zelna turin Kolasib-ah Research Centre din tumin hma an la mek a ni.

(d) AH & Vety Department chu PRRS avangin Vawk note ah an la intodelh thei lo a, hmun dang atanga lakluh dan tur ruahmanna siamfel ala harsa rih hle. Bawng hi ram pawn atanga lakluh ngai a ni bawk a, 1st Phase beneficiaries tana Punjab leh Haryana atanga lakluh chu a fuh tawk loh deuh avangin tunah hian 2nd Phase atan Meghalaya leh Assam atanga lakluh tum mek a ni. NLUP Infrastructure hnuaiah Interest Free Loan hmangin Hatchery support a ni a, Ar note supply-ah harsatna a awm lo.

(e) Horticulture Department hnuaiah hian Multi-Crop Nursery Rs. 12.50 lakh theuh hmangin District tinah Interest Free Loan pein din a ni a, amaherawh chu seedling supply-ah tun thlengin intodelh ala ni lo. Ram pawn atanga lakluh ah a innghah mek a ni. Ni 4.6.2014 a Chief Secretary hova meeting chuan Department hotute chu nasa lehzuala tan la turin a hrilh a ni.

(f) Fisheries Department hi input supply-ah ala intodelh lo hle. Tam dil fish farm-ah NLUP Infrastructure atangin a chi siamna tur siam thar a ni a, Thenzawl leh Ngengpui-ah sangha chi siam chhuahna tur NLUP Infrastructure atanga ruahman mek bawk a ni. Heng ruahmanna te hi a hlawhtlin chuan sangha chi-ah intodelh theih beisei a ni.

NLUP hlawhtlinna tur atan MZU-a Department of Economics nena thawk dunin Rural Land Use Planning chu April 2011 - September 2011 chhung khan Survey neih a ni a, he Survey Report hi a bu a siam a ni. He lehkhabu hi Revenue, RD, DC, Line Department-ah te pek an ni a, tangkai takin an hmang a.

Mizoram leilung awmdan hriatfiah lehzualna turin Atlas for Integrated Land Use Planning chu MIRSAC hnenah buatsaihtir a ni a, District-ah chuan Serchhip District Atlas buatsaih a ni a, khaw malah chuan Zawngling, Saiha District buatsaih a ni. Senso a tam deuh avangin District dang chu buatsaih tir an ni lo. He Atlas hi Mizoram chhung leh State dang a mithiamten tha an ti hle a, senso tam deuh mahse District dangte pawh hi siam leh theih nise NLUP in Mizoram tan asset tha tak a hnutchhiah dawn a ni.

NLUP hi langtlang (transparency) taka kalpui a nih theihna turin Bank kaltlangin beneficiaries hnenah tanpuina sum pek an ni a, kim takin an dawn theih phah a ni. NLUP viltu 3rd Party Monitoring Agency atan NABCONS (NABARD Consultancy Services) rawih an ni a, anni hian Mid Term Appraisal vawi ruk an rawn thehlut tawh a, tunah hian final report an buatsaih mek a ni.

Hun engemaw chen Election Model Code of Conduct avanga NLUP tanpuina sem chawlh lailawk chu sem chhunzawm leh tura hriattirna chhuah a ni tawh a. 2nd Phase beneficiaries te chuan an dawn tur ang an dawng kim thei tawh tura ngaih a ni. 3rd leh 4th Phase beneficiaries thlai chi phun turah hma lo la tawh te chu kum an hloh loh nan thlai chi pek tura ruahman a ni.