NLUP hnuaia AH & Vety Department in Karnal leh Ludhiana atanga bawng a lakluh zingah thi leh hri vei an awm tak nual avangin Bawngvulh thlangtute leh Vety department pawhin harsatna an tawk mek a. Bawng chungchanga harsatna hi hriat a nih veleh NLUP Implementing Board (NIB) chuan Department hotute nen inrawnin harsatna sutkian na tur kawng a dap nghal a. NIB Chairman Pu R. Selthuama hova May ni 8 a meeting ah chuan hma lak dan tur a rel nghal a ni.

Bawng chah thlen tawh zawng zawng zat hi 555 niin hemi zinga 522 chu sem chhuah a ni tawh a. Bawng thi leh natna vei te hi Ludhiana atanga lo kal an ni tlangpui tih hmuh chhuah a nih avangin tunah hian Ludhiana atanga bawng lakluh hi tihtawp nghal a niin supply order pawh sut lailawk a ni rih a. Ludhiana bawng te hi an quality bakah an rawn thawn dan pawh uluk zawka enfiah phawt tura tih a ni.

Tunlai hian Bawng ke na hri, Foot & Mouth Disease a len avangin NIB chuan ram dang atanga bawng lakluh te hi F & MD thehdarhtu ah an tang palh ang tih a hlau em em a. Tuna kalkawnga lo thang mek bawng 191 chu Vairengte ah leh Kolasib ah khung hranna hmun bik siam a, enthlak rih turin ruahmanna siam a ni a. Uluk taka endik hnu ah bawng hrisel leh him tha te chauh sem chhuah a ni ang a. Ran lakluh khuahkhirhna dan Control of Movement of Animals from outside Mizoram Act dung zuiin ran lakluh reng reng ramria lo endik vek turin hma lak mek a ni bawk.

NLUP hnuaia bawnglian vulh thlangtu ten harsatna an tawk hi NIB chuan pawi a ti em em a. An harsatna sutkianna tur in theihtawp a chhuah bakah vanduaina tawkte chhawmdawlna tur kawng pawh thuneitu sang zawk te nen an ngaihtuah zel dawn a ni.