Vawiin khan Champhai DC Conference Hall-ah NLUP Line Department-te NLUP Chief Media Officer Pu David L. Thangliana hovin a thukhawm a. He hun hi Champhai DC Pu H. Lalengmawia’n kaihruaiin, NLUP Line Department-te hmalakna ah media-te nena thawhhona tha zawk neih dan chungchang an sawiho a ni.
Champhai DC chuan NLUP Line Department-te chu an thawk tha hle tih a hriat thu sawiin, Mizoram Flagship Programme kaltlanga chhungkaw tam takin hlawhtlinna an neih phah vangin hei mi hlawhtling leh entawn tlakte media kaltlanga zirtitna pe thei turin hmalak a pawimawhzia a tarlang a. Hei bakah hian kangmeiin ramngaw leh nungcha a tihchereu bakah tuihna nasa takin a kangchah phah thu a tarlang a. A tuartute chu mihring theuh kan nih avangin a humhim hna hi kan thawh a pawimawhzia a sawi bawk a ni.
NLUP Chief Media Officer Pu David L. Thangliana chuan Line Department-te leh media-te thawhhona pawimawhzia tarlangin, chawimawi phute chu chawimawi tur a nih thu a sawi a. Beneficiary-te hlawhtlinna puanzarsak chuan anmahni ah phurna a siam mai bakah, hma la thalo te pawh cho chhuaktu a nih theih tur thu a sawi a ni.
Vawiin meeting hi hmanni April ni 16-a NLUP nen thahhona thuthlung ziak, Mizoram Environment & Forest Consultative Forum (MEFCOF) President Pu V.L. Bela chuan telpuiin, Mizoram pumpuia an pawlin ramngaw an humhalh “Zotheihuan” 47 an enkawl mek thu a tarlang a. Heng zingah hian 16 chu Champhai District-ah a awm thu leh, heng reserve area-ah te hian nungcha engemawzat an awm thu leh hlawhtling taka enkawl mek a nih thu a sawi a. Heng ramngaw leh nungcha humhalhna kawnga chak zawka hmalak a nih zel theih nan NLUP nena tangkawpa, Committee din mai tur a nih thu a sawi bawk.
Tukin zing khan NLUP Chief Media Officer leh MEFCOF President Pu V.L. Bela-te hian Zote khuaa reserve hmun Lengkir-a sathar humhalh thla la turin an kal a. Kum 1996 atang khan YMA Zote Branch chuan Sathar leh Zawng humhalhna hna hi kengkawh in, Sathar chenna bial ram tin 10 hmun humhalhin, Zote khua Upa pawl leh Zothei huan pawl tang rual te chuan kum 2006 atang khan ram tin 25-a zau an humhalh bawk. Heng an ram humhalh te hi tunah chuan ngaw pui tha tak, ramsa leh sava te pawhin chenna atan an hmang chho mek a ni.
