State Planning Board Vice Chairman Pu Lalkhama kaihhruaina hnuaiah Pu Brohmo Choudhury, Adviser (NE), Planning Commission hovin vawiin chawhma dar 9 khan State Guest House ah NLUP bawhzuina atana Convergence Principle chungchang an ngaihtuah ho a, Chief Secretary Pu Vanhela Pachuau leh Finance Commissioner Pu Lalmalsawma bakah Planning Department hotute leh NLUP kaihhnawih department Secretaries leh Director te an kal a ni.

Meeting kaihruaitu Pu Lalkhama chuan department hotu kalkhawmte chu an duh duh sawichhuaka zawtfiah turin a sawm a, state dang ten central sum tam tak an dawn anga Mizoram tana sum tam zawk haichhuak turin scheme tam zawk duangchhuak thin turin a fuih. Central Sorkar-a department ten CSS atana proposal leh project an duan hian State Matching Share lama a awlsam zawk nan State Planning Board hriatpuinaa hma lak thin ni se tiin a rawt bawk.

Meeting ah hian NLUP hlawhtling taka kalpui a nih theih nana CSS leh NLUP kaihkawp (convergence) dan tur an rel a, department hotute atangin harsatna an tawh theih te leh an zawhfiah duh te sawichhuakin inpawh takin sawiho a ni. Horticulture department bikah Technology Mission (TM) chungchang te, Forest hnuaiah National Bamboo Mission te, NREGA - Rural Department enkawl mekte leh Agriculture hnuaia ISOPM bakah Fishery development chungchangte sawiho a ni a, hriat chian loh lai te inhrilhfiahin hun dangah chipchiar zawka department officials te nen la sawi chhunzawm leh tura dah a ni.

Planning Commission Adviser (NE) Pu Brohmo Choudhury chuan convergence chungchang ah Planning Commission lam atanga engmah harsatna a awm loh tur thu a tarlang a, Chief Secretary Pu Vanhela Pachuau pawhin NREGA atana sum awmte chu tha taka hmang zova, a tul chuan a dang pawh dil belh zel theih a nih thu a sawi lang bawk a ni.