Pu J.H.Rothuama, Chairman, NLUP Implementing Board (NIB) chuan nimin khan Mamit District khaw hrang hrang tlawhin, NLUP dawngtute hnathawh a hmunah a enpui.

Mamit khaw chhung leh pawn a Lines Department hrang hrangten NLUP an pek te, PPP Mode hmanga NLUP tana Kuhva, Serthlum leh Rubber Nursery siamte pawh tlawhin, hmalakna kal mek ah hlawhtling tak takte a hmuhin lawmawm a tih thu Pu Rothuama chuan a sawi a ni.

Sangha Dil siamtute an hlawhtlin hle laiin, an sangha tharte hmun danga hralh tuma Vur an mamawh hle tih a hmuhin, Vur siamna (Ice Plant) an mamawh hle tih a hriatin, hemi chungchang hi ngaihtuah vat a tul thu NIB Chairman chuan a sawi a ni.

Mamit District chhunga NLUP dawng tute hmalakna a hlawhtling tlangpui chu NLUP dawngtute leh Lines Department enkawltute thawhrah a ni tiin, tun hnu zelah Lines Department hotuten ngaihven zui leh enpui zui turin (Monitoring) a pawimawh hle ang, inthlahdah lovin theihtawp chhuah zel turin Pu Rothuama chuan a hrilh.

NIB Chairman hi Aizawl lam atangin Pu Zorammuana, NIB Secretary, Pu David L.Thangliana, Chief Media Officer, NIB, Pu Chhanhima, Soil Officer, Pu T.Ramzauva, PS te bakah Lines Department a hruaitu hrang hrangte nen inkawmna hun neiin, NLUP hmalak zel dan tur an sawiho a ni.