Vawiin khan Fisheries Department hnuaia Kolasib District chhunga NLUP a 3rd leh 4th Phase a Sangha khawitu Beneficiaries 84 te chu 2nd Installment tanpuina sum cheng 40,000 theuh hlan niin an tan hian Synod Conference Hall, Diakkawn ah Technical Training buatsaih a ni a. He hun hi Fisheries Department Secretary Pu Thlamuana leh Kolasib DC Pu H. Lalengmawia, IAS ten an hmanpui a ni.
NLUP semna programme ah hian Pu Thlamuana chuan NLUP hnuaia sangha khawitu tena tanpui an dawn chu a nih dan ang tur taka hmang turah beneficiaries kalkhawmte chu chahin Sawrkar intuamhlawmna hi dik taka hman a tul a ni a ti a. He tanpuina sum hi dinchhuahpui leh hlawhtlinpui ngei tura chahin beneficiaries te chu Department mithiam te engtik lai pawha inthlahrung lova rawn thin turin a hrilh bawk a ni.
Pu H. Lalengmawia chuan sangha khawi lamah, a hmun hma in a zir avangin Kolasib leh Mamit district-a sangha khawitu te chu Mizoram tan hmahruaitu ni tura beisei an nih thusawiin, hei hi theihnghilh hauh lovin theihtawp chhuaha hma la turin ka duh che u ani a ti a. Tanpuina sumfai hi hlawhtlinna bul ani ber lova, taihmakna, mahni inthununna, tumruhna leh mahni inrintawkna te a ni zawk a, hengte hi hlawhtlinna hmanrua mihring tena kan neih ber ani a, kan rilru put hmang thlaka hengte hi tih tak zetna nen kan hman thiam a tul a ni, a ti a. Kan hlawhtlinna te hi keimah avang a ni tia kan pawm thin angin kan hlawhchhamna te pawh hi midang mawhpuh lova keimah vang tho ani tia kan pawm a ngai a ni, a ti bawk.
NLUP Semna leh Training programme hi Pu C. Laldawngliana, District Fisheries Development Officer (DFDO) Kolasib chuan a kaihruai a, Pu S.P. Singh, Joint Director, Fisheries Department chuan Technical Report a tarlang a, Pu B. D. Tyagi, Director, Fisheries Department pawhin thu a sawi bawk a ni.
Chawhnu lama Technical Training ah hian Pu C. Laldawngliana DFDO Kolasib, Pu Zohmingthanga, FEO, Kolasib leh Pu Lalthangzauva, AFO Vairengte ten sangha khawitu te hnenah sangha dil siam leh enkawl dan chungchangte, hlawk zawka sangha khawi chungchang te zirtirna an pe a ni.
