Mizorama lui hnar leh tuikhur hnar tih nun thar lehna tura ruahmanna thar "Rain Garden Scheme" kalpui dan tur sawiin vawiin khan NLUP Implementing Board leh  Mizoram Environment & Forests Consultative Forum (MEFCOF) aiawhte Chief Minister Bangla ah an thukhawm.

Vawiina thutkhawm hi Pu James Lalrinchhana, Secretary, NLUP Implementing Board in a kaihruai a, MEFCOF Patron, Pi Lal Riliani'n MEFCOF hmalak tawhna te fakawm leh chhuanawm a tih thu sawiin Mizorama ramngaw leh nungchate humhalh an nih kawngah nasa lehzuala tan lak sauh sauh a ngaih thu leh tha thlah lova ke pen a tul thu a sawi a ni.

Pu PL Thanga, Vice-Chairman, NIB in powerpoint presentation pe in sik leh sa leh ramngaw, tuihna humhalh kawnga NLUP hmalakna chi hrang hrang a tarlang a, "Rain Garden Scheme" awmzia sawifiah nghalin he ruahmanna kalpui tura thil tih ngai leh hmalakna tur awm a lang te a sawifiah nghal bawk a ni.

"Rain Garden Scheme" hi Maryland, USA a mipakhatin ruahtu vantka hman tangkaina atana ruahmanna kum 1990 a alo siam tawh a ni a, he ruahmanna kaltlang hian awlsam leh hautak silo a ruahtui luang ral tur lakkhawm leh tangkai zawka hman a theih avangin Mizoram kumtin ruahtui 230mm vel dawng thin tan thil tangkai tak ani thei dawn a, Tui tai, tuikhur leh lui hnar tih nun thar leh bakah ramngaw siam thar leh nungcha humhalh kawngah nasa takin Mizoramin a tangkaipui thei dawn a ni.

Pu Hualthanga, Director, Land Resources, Soil & Water Coversation hnen atang Rain Garden Scheme behchhana hma an lo lak tawh dan leh a hlawkna te ngaihthlak niin, Pu Lalmuanzova, Engineer-in-Chief, PHED in an department in tuihna leh lui hnar humhalk kawnga hma an lak dan a sawifiah bawk.

Vawiin thutkhawmah hian Mizoram pum huapa  Rain Garden Scheme kalpui tura thil tih ngai chi hrang hrang an sawiho a, khawtlang hruaitute, tlawmngai pawlte leh zirlaite nen a thawhho a pawimawhzia te sawiin ruahmanna an sawiho a, NLUP-NEDP Convergence Scheme hnuaia NIB in hmalakna thar atana ruahmanna a siam "Rain Garden Scheme" hi kum 2018-2019 chhunga kalpui nghal anih theih nan Chief Minister hnena thlen an rel bawk a ni.