NLUP Apex Board Meeting vawi 9-na rawn hmanga New Delhi atanga Central Sorkar aiawha lo kal Dr J.S.Samra, CEO, National Rainfed Area Authority (NRAA) chuan nimin ni 29 Nov. 2011 khan Thenzawl-a NLUP tanpuina dawngtu, trade hrang hrang thlangtu te hmalak dan a hmunah a tlawh a, tukin zing khan NLUP Nodal Minister Pu H.Liansailova chu a chenna inah hmuin inkawmna hun an hmang a, NLUP kalpui mek dan te leh rawtna a neih te Minister hnenah a thlen bawk.Tukin khan Aizawl-a Industries leh A.H. & Vety. Sector hnuaia NLUP tanpuina dawngtu beneficiary te a tlawh kual nghal bawk.

Dr J.S.Samra chuan Mizoram Sorkar-in NLUP a kalpui mek chu hmalakna danglam tak, kuthnathawktu mi rethei leh harsa te chhanchhuahna leh dawmkanna tura ruahmanna ropui tak ni-a a hmuh thu a sawi a, NLUP kalpui mek dan a enfiahna ah lawmawm tiin a buaipuitu Sorkar hnathawk ten lang tlang taka engkim an kalpui chuan a ruka kuthnathawktu te chanai lo eisakna hmun a awm lo a ni, a ti. NLUP chu harsa / rethei te chhanchhuahna programme a nih ang takin NLUP tanpuina dawngtu te chu an sum thawh chhuah te a pun phah a, anmahni pawh an hlim a, rah tha tak a chhuah ni-a a hmuh thu a tarlang bawk. Mizoram boruak leh sik leh sa chu thlai tana tha tak a nih avanga hman tangkai thiam a ngaihpawimawh thu sawiin Oil Palm te pawh India ram tlakchham thil, rampawn atanga lei nan kum tin sum vaibelchhe sang tam tak sen ral a nih thin thu a sawifiah a, a hralhna chu la zau belh zel tur a nih avanga ching uar zel a hlawkthlak tur thu a sawi lang bawk. NLUP chuan central scheme te pawtkhawma convergence zawnga a kalpui hlawkna chu scheme thenkhata harsatna leh rokhawlhna awm thei te a sukiang thei dawn a ni, a ti.

Dr J.S.Samra hi mithiam, Agriculture-a doctorate degree (Ph.D.) nei a ni a, Post Doctorate Germany ah zir chhunzawm a, Swiss Federal Institute of Technology, Zurich, Switzerland ah Visiting Professor a ni bawk a, Indian Council of Agricultural Research (ICAR) ah hian kum 33 a thawk tawh bawk. Ruahtui chawm ram/state enkawlna lama hotu niin Integrated Watershed Development Programme (IWMP) te pawh hi anmahni duan chhuah a ni a, hlawk zawng thei ang bera lo neih dan te zirtira thehdarh te hi an hnapui ber pakhat a ni bawk. NRAA hi Planning Commission hnuaia din thar a ni a, Sorkar Laipui programme hrang hrang khaikhawm leh Flagship Programme te hi a bik takin an enkawl thin a ni.

Dr. J.S. Samra hi NLUP beneficiary te a tlawh kualna ah NLUP Implementing Board Vice Chairman Pu P.L. Thanga leh Nodal officer ten an tawiawm a ni.